O pasado 2 de outubro deu comezo un novo curso da Escola de Saúde, que se inaugurou coas clases de taichi tradicional e de chi kung. O vindeiro luns, día 16, empezaranse a impartir tamén as sesións de ioga terapéutico. A actividade desenvolverase en espazos interiores: no pavillón polideportivo do Milladoiro terá lugar os luns e mércores, de 10:00 a 11:00 horas, mentres que en Bertamiráns será no Pazo da Peregrina, os martes e xoves de 10:00 a 11:00 horas e os luns e mércores de 17:00 a 18:00 horas.

O ioga combina o exercicio físico coa meditación para conseguir un resultado terapéutico. Trátase dunha práctica que conecta o corpo, a respiración e a mente. Nela empréganse posturas físicas, exercicios de respiración e meditación para mellorar a saúde. Ademais de axudar a potenciar a flexibilidade, serve para reducir a presión arterial e a frecuencia cardíaca, reducir o estrés, mellorar a coordinación, facilitar a dixestión...

As persoas interesadas en anotarse poden facelo cubrindo este formulario ata o 12 de outubro, ás 14:00 horas. Terán prioridade os/as empadroados en Ames. Para calquera dúbida pódese consultar co departamento de Promoción da Saúde escribindo ao enderezo electrónico promociondasaude@concellodeames.gal. As clases darán comezo o 16 de outubro e rematarán o 27 de xuño de 2024.

Escola Municipal de Saúde
A Escola Municipal de Saúde naceu coa intención de establecer e impulsar estratexias dirixidas a fomentar o desenvolvemento de ferramentas e habilidades encamiñadas a coidar de xeito efectivo a saúde, entendida dende un punto de vista holístico. Tamén ten o obxectivo de promover a adopción de hábitos e estilos de vida saudables e fomentar a corresponsabilidade das persoas no coidado da súa saúde, acadando unha maior calidade de vida.

A través das actividades da Escola Municipal de Saúde as persoas participantes compartirán un espazo de encontro onde se abordará e se traballará, coa guía de expertos/as, diferentes temas relacionados co autocoidados, a prevención, o benestar emocional, a parentalidade positiva... Tamén se afondará na promoción de hábitos de vida saudables como son a actividade física, a alimentación saudable e a prevención de condutas aditivas… e en aspectos claves do benestar (resolvendo dúbidas, compartindo diálogo, etc).