Coa chegada da época estival, o Concello de Ames volve a poñer en marcha diversas actividades deportivas para favorecer as alternativas de ocio saudable entre os veciños e veciñas de Ames. Este ano ofrécense cursos de piragüismo, de natación, de aguagym e de ioga.

Dende hoxe, luns 12 de xuño, e ata o vindeiro día 23, as persoas interesadas xa poden inscribirse nas clases de natación que se impartirán durante o mes de xullo. Quen prefira acudir á quenda do mes de agosto poderá anotarse entre o 10 e o 21 de xullo. Este cursos están organizados polo departamento de Deportes de Ames, en colaboración coa Deputación da Coruña.

Horarios
Tanto os cursos de xullo como os de agosto están organizados en función das franxas de idade dos participantes. Deste xeito, ás 11:15 horas comezan as clases os rapaces e rapazas que superan os 10 anos, mentres que ás 12:00 é o momento dos nenos/as de 8 e 9 anos. A continuación, ás 12:45 horas entrarán na piscina as crianzas de 6 e 7 anos; e finalmente seguiranos, arredor das 13:30 horas, os cativos e cativas de entre 3 e 5 anos.

Trámites de inscrición
As inscricións deben realizarse de xeito telemático, a través da plataforma Cronos, seguindo estas instrucións. Os impresos para facer efectivo o pagamento (autoliquidación) poderán solicitarse nas oficinas de recadación, ben no Milladoiro (rúa da Viorneira, número 6), ou ben en Bertamiráns (na praza da Horta de Abaixo, número 6).

Outra opción é facelo a través do correo electrónico ames@canaltributos.com ou chamando ao número de teléfono 981 88 48 96. No caso de dispor de certificado dixital ou DNI electrónico poderase descargar o documento de pago e aboar o importe a través da ligazón da Oficina Virtual Tributaria.

O custe dos cursos é de 20 euros (reducíndose a 10 euros para o segundo membro de cada familia e a 5 euros para o terceiro e restantes). Para máis información sobre a actividade pódese enviar un correo electrónico ao enderezo deportes@concellodeames.gal ou chamar ao número de teléfono 619 842 504.