Co inicio do mes de xullo comezaron os cursos de natación, que se imparten nas piscinas municipais descubertas de Bertamiráns e do Milladoiro. Os rapaces e rapazas que queiran participar nas clases do mes de agosto están a tempo de inscribirse, xa que o prazo para anotarse vai dende hoxe, luns 15 de xullo, ata o domingo 28 de xullo. Durante o mes de xullo están participando 57 rapaces e rapazas; 34 no Milladoiro e 23 en Bertamiráns.

Tanto os cursos de xullo como os do mes de agosto están organizados en función da idade das e dos participantes, polo que ambos manteñen os mesmos horarios. Ás 12:00h comezan os rapaces e as rapazas que superan os 9 anos de idade, mentres que ás 12:45h é a quenda dos/as nenos/as de 6 a 8 anos. A continuación, ás 13:30h, entra na piscina a rapazada de 3 a 5 anos, que son os últimos en mergullarse na auga.

Trámites de inscrición
As inscricións hai que tramitalas de xeito telemático a través da plataforma Cronos. Os impresos para facer efectivo o pagamento (autoliquidación) poden solicitarse nas oficinas de Recadación, de xeito presencial. Existen dúas oficinas de Recadación, unha no Milladoiro, na rúa da Viorneira, número 6; e outra en Bertamiráns, na praza da Horta de Abaixo, número 6. Tamén se pode solicitar en horario de tarde os luns e mércores, de 16:15h a 18:30 horas.

Outra opción é facelo a través do correo electrónico ames@canaltributos.com ou chamando ao número de teléfono 981 88 48 96. No caso de dispor de certificado dixital ou DNI electrónico pódese descargar o documento de pago e aboar o importe a través do enlace da Oficina Virtual Tributaria.

Prezos dos cursos
No tocante ao prezo, cada familia debe abonar 20 euros, reducíndose a 10 para segundos membros e a 5 para terceiros e restantes. Para máis información pódese enviar un correo electrónico aos enderezos deportes@concellodeames.gal / deportes.milladoiro@concellodeames.gal ou chamar aos números de teléfono 981 535 940 ou 619 842 504.