O programa de Sexualidade positiva e saudable [con]sentido prosegue o sábado 18 de setembro cunhas Xornadas de Educación Sexual. O programa, posto en marcha pola Concellaría de Mocidade, conta cunha ampla programación que abrangue un concurso de fotografía, obradoiros de sexualidade, xornadas de Educación Sexual e un videoforum. As xornadas queren ao longo de cinco horas achegarse aos mozos de Ames un novo xeito de achegarse á sexualidade. Podedes inscribirvos en con.sentido@agasex.org e descargar nesta ligazón a ficha de inscrición. Este programa se encadra dentro dos orzamentos participativos de Mocidade.
O programa [con]sentido desenvolvido pola Concellaría de Mocidade quere fomentar a igualdade entre os sexos, cultivar o respecto, a aceptación e a tolerancia cara todas as sexualidades, favorecer o autocoñecemento e o coñecemento das demais persoas, así como promover unha vivencia libre, segura e satisfactoria da sexualidade. Para iso [con]sentido programou diversas actividades nos meses de agosto, setembro, outubro e novembro.
As Xornadas de Educación Sexual vanse celebrar o sábado 18 de setembro na Casa da Cultura do Milladoiro. A xornada vai comezar ás 10:00 horas coa recepción e a presentación do programa [con]sentido. A continuación terá lugar a ponencia “Entre raiadas e crushes, ou como entender as relacións, o xénero e a dimensión emocional” da man de Sara Vierna, educadora social experta en xénero e educación emocional. Ás 11:15 os asistentes van participar na charla “Sexualidades dixitais: Covid 19 e outras pandemias”, de Lorena Boquete, psicóloga e sexóloga, técnica en Promoción da Igualdade.
A xornada prosegue ás 12:30 horas, e tras un pequeno descanso, coa charla “Sexualidade e diversidade corporal” de Cristina García, traballadora social e sexóloga . A continuación vaise proceder á entrega de premios do I Concurso de fotografía #sexualizarte, para rematar coa actuación da poeta feminista, Lúa Mosquetera.
Para participar é necesario inscrición previa. Podedes inscribirvos en con.sentido@agasex.org
Obradoiros de sexualidade
O programa [con]sentido prosegue no mes de outubro con cinco obradoiros. Serán o 9, o 23 e o 30 de outubro de mañá e tarde. Ao longo destas tres xornadas as mozas e os mozos participantes traballarán diversas accións coa pretensión de promocionar a igualdade e o libre exercicio dos dereitos sexuais e reprodutivos. Con estas accións abordaranse temáticas relacionadas co sexting, a educación menstrual e a elaboración de compresas de tea, os métodos anticonceptivos, e outros máis prácticos como a elaboración dunha vulva-puff, ou a construción de xoguetería erótica DIY.
O programa [con]sentido vaise clausurar o venres 26 de novembro cun videoforum co gallo do día internacional da eliminación da violencia contra as mulleres. Pódese consultar o programa completo premendo na seguinte ligazón.
Novas relacionadas:
Revista AmesGo: "Aberta a inscrición para as Xornadas de Educación Sexual do [con]sentido"
