O departamento de Normalización Lingüística, a través do programa Apego, trae ata o Concello de Ames a actividade dirixida por Marta Ortiz. Trátase dun obradoiro, dirixido a nenos e nenas de 2 a 6 anos de idade, no que se combinarán teatro, contos, poesía e música. “Canta, Buguina, canta!” busca explorar os sentidos, xogar coas palabras, debuxar ideas e transitar emocións. A buguina levará a soñar con viaxes en barquiños de pau nas que poder explorar mundos sorprendentes.

A sesión terá lugar na Casa de Cultura de Bertamiráns o venres 30 de abril, ás 18.00 horas. É unha actividade gratuíta e para anotarse é preciso enviar un correo a normalizacion@concellodeames.gal indicando o nome e apelidos das persoas que solicitan ir, a idade das crianzas e un teléfono de contacto. O prazo de inscrición está aberto ata o vindeiro xoves 29 de abril.

O programa Apego
O programa Apego está dirixido a todas as familias de Ames que estean a esperar un bebé ou que xa o teñan con idade inferior a 6 anos.

É un proxecto cooperativo de varios concellos para promover e apoiar o uso do galego na socialización da primeira infancia que apoia as familias con actividades, formación e recursos para facilitar e mellorar a crianza.

As familias interesadas poden sumarse ao programa poñéndose en contacto co Servizo de Normalización Lingüística (SNL) do Concello de Ames enviando o formulario cuberto a través da páxina apego.gal, escribindo a normalizacion@concellodeames.gal ou chamando ao teléfono 662 377 215.

Novas relacionadas:

El Correo Gallego: "Chavales de dos a seis años explorarán a ritmo de caracola sus sentidos"