Ante a alta demanda desta actividade, organízase unha segunda sesión para as persoas interesadas. Será o mesmo venres, 14 de xuño, ás 19.30 horas, na Casa da Cultura do Milladoiro e as persoas interesadas en asistir tedes que enviar un correo a normalizacion@concellodeames.gal no que indiquedes nome e apelidos das persoas que vaiades vir, idade das crianzas e teléfono de contacto.

Trátase dunha sesión de contos interactivos para rir, xogar, e axudar a relaxarnos e a crear espazos compartidos de xogo, divertimento e calma. Durante a sesión convidarase ás familias participantes a rir, xogar, compartir e aprender os beneficios de estar en calma e centrarse no momento presente. Está dirixida a familias con crianzas a partir de 3 anos. É unha actividade de balde pero é preciso inscribirse canto antes. As prazas asignaranse respectando a orde de recepción das solicitudes, e non se admitirán inscricións fóra do período de inscricións.

O programa Apego, un vehículo de transmisión da lingua
O programa Apego é un proxecto colaborativo no que participan varios concellos, entre os que se inclúe Ames, e que vai dirixido ás familias que estean a esperar un bebé ou que teñan crianzas entre 0 e 6 anos. O seu obxectivo é promover, apoiar e normalizar o uso do galego na socialización da primeira infancia, empregando distintas actividades e recursos.

As familias interesadas en sumarse á iniciativa poden facelo poñéndose en contacto co Servizo de Normalización Lingüística do Concello de Ames, escribindo un correo a normalizacion@concellodeames.gal ou chamando ao número de teléfono 662 377 215. Así mesmo, tamén poden facelo cubrindo o formulario “Súmate ao apego”, que está dispoñible na páxina web do programa, apego.gal.