A Xunta de Goberno local vén de adxudicar o expediente de licitación do Servizo de desbroce, limpeza e mantemento dos núcleos rurais do concello de Ames á empresa Jardincelas S.L. A través deste servizo, que se enmarca dentro do PLAMRURAL AMES, preténdese realizar os traballos de limpeza, mantemento e conservación dos accesos e interiores dos núcleos rurais das once parroquias amesás. O valor do contrato, de dous anos de duración, ascende a 227.754 euros.
O Concello de Ames vai poñer en marcha un servizo de desbroce e mantemento dos núcleos rurais do concello. Este programa está destinado a manter os camiños, os accesos e os interiores das aldeas nas condicións idóneas, así como a mellorar a habitabilidade das mesmas. Os traballos consisten na realización de desbroce, limpeza e mantemento das marxes das estradas; incluíndo a contorna dos lavadeiros, igrexas, locais sociais, muíños, beirarrúas. etc. Este mantemento realizarase exclusivamente no rural, concretamente nas 107 aldeas que conforman as 11 parroquias amesás.
O servizo comprende ademais a recollida, a carga e o transporte dos produtos procedentes deses traballos de desbroce e a retirada de obstáculos, terra ou maleza nas gabias, pozos ou beiras de ríos e regatos.
Este servizo foi adxudicado pola Xunta de Goberno Local á empresa Jardincelas S.L. mediante procedemento aberto, regulación harmonizada, tramitación ordinaria varios criterios de adxudicación por 227.754 euros.
O contrato terá unha duración de dous anos, podendo prorrogarse anualmente ata un máximo de catro anos.
Equipo mínimo de tres persoas
Deberase contar cun equipo mínimo de tres persoas traballando simultaneamente, debendo prevalecer a paridade entre o equipo de traballo. Estes traballos inicialmente serán realizados en xornada partida de mañá e tarde, aínda que se poida estudar a posibilidade de realizalos en xornada continua, pero cumprindo o horario de 8 horas diarias (40 horas semanais).
Actuarase nas 11 parroquias do concello de Ames e nun total de 107 núcleos rurais. Os traballos de limpeza e mantemento dos accesos e interiores dos núcleos rurais executaranse en Agrón (14 núcleos); na Ameixenda (8 núcleos); Ames (18 núcleos); Biduído (13 núcleos); Bugallido (11 núcleos); Covas (8 núcleos); Lens (2 núcleos); Ortoño (15 núcleos); Piñeiro (6 núcleos); Tapia (3 núcleos); e Trasmonte (9 núcleos).
O alcalde de Ames e concelleiro de Servizos Básicos, Blas García, califica este novo servizo de "un paso moi importante para o coidado e posta en valor dos núcleos rurais do noso concello, e representa unha proba máis da aposta e defensa que fai este Goberno do rural amesán".
Novas relacionadas
El Correo Gallego: "Adxudicado o servizo de limpeza e desbroce rural"
