Ames converterase este sábado, 7 de setembro, na capital do fútbol sala masculino galego coa celebración do primeiro derbi entre o Noia Portus Apostoli e o Pescados Rubén Burela. Este partido amigable disputarase ás 19.00 horas no pavillón municipal de Bertamiráns. Trátase dun derbi inédito, xa que vai ser a primeira vez que coincidan estes dous equipos na máxima categoría nacional de fútbol sala masculino. Ademais, na actualidade son os dous únicos queipos que compiten nesta categoría.  

Para o o Noia Portus Apostoli é a terceira temporada consecutiva que vai a xogar na primeira división do fútbol sala nacional masculino, mentres que o Pescados Rubén Burela volve a máxima división do fútbol sala nacional tralo ascenso acadado a temporada pasada.

A concelleira de Deportes e Promoción da Saúde, Susana Señorís, destaca o traballo que realiza o FC Meigas en prol do fútbol sala e do deporte amesán en xeral. “Este sábado 7 de setembro a veciñanza de Ames vai poder desfrutar do mellor fútbol sala masculino galego gracias a este partido amigable entre o Noia Portus Apostoli e o Pescados Rubén Burela. Animo á veciñanza a participar neste evento deportivo porque van poder gozar dun gran espectáculo deportivo”.

A presidenta do FC Meigas, Paola Vignolo, explica que o motivo polo cal se organiza este partido é para promocionar o fútbol sala en Ames. “Dende hai anos estamos dando pasos co equipo feminino, tendo xa un equipo na segunda división nacional, algo que nunca sucedera en Ames nin na contorna, e con este partido queremos fomentar e darlle aínda máis visibilidade a este deporte”.

Copa Galicia de fútbol sala feminino
Por outra banda, o Fútbol Club Meigas, que vén de gañar a eliminatoria da Copa Galicia contra o Bembrive, enfrontarase o vindeiro 1 de outubro ao Pescados Rubén Burela FS, en cuartos de final desta competición. Trátase dunha cita histórica para o equipo amesán, que recibirá no pavillón de Bertamiráns a un dos mellores equipos de fútbol sala feminino do panorama internacional.

Cómpre lembrar que o Fútbol Club Meigas xogará esta tempada por segunda vez consecutiva na súa historia na segunda división do fútbol sala feminino nacional.

Novas relacionadas:

La Voz de Galicia: "Bertamiráns acoge el sábado un amistoso entre el Noia y el Burela"