A Oficina de Voluntariado de Ames sumouse en 2022 ao proxecto solidario “Painting for Others”, nado hai máis de 20 anos na cidade de Sevilla e que promove a ONG Cooperación Internacional. Ter unha vivenda digna é un dereito e afecta de xeito moi importante á calidade de vida das persoas. Con este fin púxose en marcha esta iniciativa, que busca rehabilitar os fogares de persoas con menos recursos co traballo e a implicación de mozos/as voluntarios e voluntarias.

O labor principal consiste no pintado e na limpeza de paredes, para a que as persoas voluntarias reciben unhas sesións de formación que lles permitan axudar do mellor xeito ás necesidades das persoas. Ao mesmo tempo, búscase sensibilizar sobre as condicións de vida e as dificultades as que se enfrontan outras persoas, e contribuír á vez ao estado de ánimo destas familias ou persoas soas, que reciben das voluntarias e voluntarios un trato próximo e cálido.

Deste xeito, este luns 31 de xullo 15 mozos e mozas, que están de visita en Santiago de Compostela, comezaron a pintar unha vivenda no Milladoiro, que foi seleccionada polos servizos sociais do Concello de Ames. Os traballos realizaranos durante tres días, ata o mércores 2 de agosto. Está previsto pintar tres vivendas máis nesta edición de “Pintando para os demais”. Trátase de dignificar vivendas de persoas do noso concello con baixos recursos.

O coordinador da Oficina de Voluntariado de Ames, Rubén Ramos, explica “estamos encantados de que unha iniciativa solidaria tan potente e tan enriquecedora para todas as partes se poida facer en Ames e se asente como programa importante dentro da nosa acción voluntaria”.

A concelleira de Benestar Social, Igualdade e Voluntariado, Uxía García, destaca “a dobre función que ten o programa Pintando para os demais. Primeiro, a través desta iniciativa, mellórase o estado no que se atopan algunhas vivendas de veciños e veciñas do noso concello con baixos recursos. En segundo lugar, é unha experiencia moi enriquecedora para os 15 mozos e mozas que participan nesta iniciativa, xa que son conscientes e sensibilízanse coas dificultades que atravesan moitas familias”. Ademais, agradece “a colaboración da organización Cooperación Internacional por desenvolver en Ames o programa Painting for Others”.

Novas relacionadas:

El Correo Gallego: "Quince voluntarios ayudan a vecinos de Ames con escasos recursos pintando sus inmuebles"

Ames Go: "Painting for others volve pintar unha vivenda en Ames de xeito solidario"

El Correo Gallego: "Quince voluntarios ayudan a vecinos de Ames con escasos recursos pintando sus inmuebles"