As bibliotecas amesás pechan con estas dúas presentacións as súas actividades de animación á lectura para o público adulto ata despois do verán. Estas dúas presentacións, que se desenvolverán no Pazo da Peregrina de Bertamiráns ás 20:00 horas, coinciden ademais coa presentación da editorial nêspera, nova editora independente que aposta pola publicación coidada de obras orixinais en galego.

“Unha cervexa Chang”, o mércores 15 de xuño
A terceira presentación do mes de xuño será este mércores, 15 de xuño, con Manuel Portas e o seu libro “Unha cervexa Chang”. Trátase dun libro que narra como ás veces cando temos un problema que non sabemos como resolver, cómpre afastarse da realidade e contemplala a distancia. E isto é o que fai Daniel, o protagonista protagonista desta novela, que en plena crise persoal e económica decide aproveitar as vacacións de Nadal para descansar lonxe, nunha praia paradisíaca de Tailandia. Só para iso, para que as ameazadoras circunstancias que o abafan, un matrimonio fracasado, un negocio de antigüidades en decadencia, unha familia que lle reclama responsabilidades desmedidas e unha ansia de liberdade que xa parece ilusión, queden un tempo á marxe e deixen albiscar un horizonte novo.

Mais, cando xa está a piques de volver para a casa, aos serios problemas do negocio familiar e á súa contraditoria vida sentimental súmaselle un acontecemento inesperado que vai complicar aínda máis a súa maltreita existencia.

Manuel Portas é profesor de lingua e literatura no Instituto Xelmírez I de Santiago, do que é o seu director. Alén da colaboración en obras de carácter didáctico e publicacións pedagóxicas, é coñecido polo seu labor no campo da análise sociolingüística, onde salienta Língua e sociedade na Galiza (1990), obra sobranceira da sociolingüística galega. Denso recendo a salgado (2010) foi a súa primeira novela. Seguírona Un dedo manchado de tinta (2011), Faneca Brava (2013) e Amor en alpargatas (2015). Con Lourenço, xograr obtivo o Premio García Barros en 2015. No acto de presentación Manuel Portas estará acompañado polo autor, investigador e crítico Xosé Antonio López Silva; pola concelleira de Cultura, Natividade González e polo alcalde de Ames, Blas García.

“Avelaíñas eléctricas”, o xoves 16 de xuño
As Bibliotecas de Ames pechan este ciclo de presentacións o xoves 16 de xuño coa obra “Avelaíñas eléctricas” da escritora Sica Romero. “Avelaíñas eléctricas” trata con delicadeza e agarimo distintos temas universais e ancestrais, como a violencia, o amor, a amizade, a responsabilidade, a ética, o sexo e a sexualidade, a discriminación, a diferenza, as drogas ou as adiccións.

Este libro é ademais o primeiro traballo de nêspera. Néspera editora é un proxeto independente con sede en Ames, creado neste ano 2022 por tres socias: Vanessa Rodríguez, Breixo Parcero e Samuel Baltar. Nace coa idea de publicar obras orixinais en galego, coidadas e traballadas, tanto en contido como en forma, independentemente do seu xénero, do seu tema, e da idade e tipo de lectora á que se dirixen.

A experiencia persoal e laboral de Sica Romero estivo sempre relacionada coa literatura e coa arte. Afeccionada ós libros dende ben pequena gradúase en Historia da Arte e despois cursa dous mestrados: en “Xestión de Patrimonio, Museos e Mercados”, e en “Formación de profesorado, Especialidade-Xeografía e Historia”. Compaxinou estes estudos cos traballos de bibliotecaria, auxiliar de sala en museos, guía de exposicións, correctora ortotipográfica e investigadora para a edición de libros.

Ao acto de presentación de “Avelaíñas eléctricas” contará coa participación do alcalde de Ames, Blas García; da concelleira de Cultura, Natividade González; de Sica Romero, autora; de Montse Montaos, xornalista e guionista; de Helena Pérez, Vanessa Rodríguez e Samuel Baltar, de nêspera editora.

Novas relacionadas:

El Correo Gallego: "Manuel Portas e Sica Romero levan as súas obras ao Pazo da Peregrina"