As animadoras á lectura da Biblioteca Municipal de Ames, Bibiana Calvo Ares e Divina Fernández Canosa, asómanse cada mércores, dende o pasado mes de novembro, a fiestra do Facebook das bibliotecas para seguir animando á rapazada amesá a ler, escoitar e desfrutar das historias que contan os libros. Fano a través da rede, ampliando ademais deste xeito as posibilidades de aforo ilimitado que supón esta vía de comunicación.

As sesións do mes de febreiro comezaron o pasado mércores día 3 co conto Lobo Feroz. Continúan este mércores 10 de febreiro co conto A xoaniña rosmona. O día 17 as animadoras á lectura narrarán O rato e os ventos, e para pechar a programación do mes de febreiro, os nenos e nenas de Ames poderán desfrutar do conto Oh!, o mércores 24 de febreiro.

Dixicontos no confinamento
Non é a primeira vez que a Biblioteca Municipal leva a súa actividade de contacontos á rede. Durante o período de confinamento as actividades de animación á lectura víronse absolutamente limitadas. Nesa ocasión, as animadoras á lectura das bibliotecas realizaron 3 contacontos virtuais á semana que se retransmitiron os luns, mércores e venres, tamén a través do Facebook do departamento. Os 30 vídeos realizados nesta época seguen accesibles para todas aquelas persoas que os queiran ver na páxina de Facebook da biblioteca municipal.

A concelleira de Cultura e Tecnoloxías da Comunicación, Natividade González, explica que “a pesar de que polas novas restricións as bibliotecas permanecerán pechadas ao público ata o 17 de febreiro a programación de animación á lectura continúa na medida do posible a través do Facebook das bibliotecas. Cada mércores as animadoras á lectura publican os seus dixicontos e a partir do martes día 9 comezarán a festexar o entroido propoñendo recursos, información, xogos, pasatempos, cancións... baixo a etiqueta #entroidoteca2021”.