O rexedor municipal reuniuse este mércores, 28 de abril, co vicepresidente primeiro e conselleiro de Presidencia, Xustiza e Turismo da Xunta de Galicia, Alfonso Rueda, co obxectivo de tratar diferentes temas de vital importancia para o Concello de Ames. Blas García agradece este recibimento por parte do vicepresidente e destacou “estou convencido que acadaremos importantes avances en varias das necesidades plantexadas nesta reunión co obxectivo de que o concello amesán avance e mellore”.

Un dos asuntos que lle expuxo o alcalde foi a necesidade de desbloquear a creación dun parque comarcal de bombeiros que dea servizo a toda a comarca. Blas García destaca que “hai boa vontade tanto por parte dos Concellos da comarca como por parte do vicepresidente primeiro para desbloquear este asunto, polo que agardamos poder avanzar neste tema”. Neste senso, o obxectivo é manter unha xuntanza o antes posible coa Dirección Xeral de Emerxencias para abordar este asunto.   

Por outra banda, solicitouse a colaboración da Xunta de Galicia para outros asuntos. Solicitouse un novo vehículo híbrido para o parque móbil da Policía Local de Ames. Neste senso, o vicepresidente avanzou que vai analizar a posibilidade de poder dotar ao longo deste ano cun novo vehículo ao corpo de seguridade amesán a través dun convenio ou doutra fórmula.

Tamén se solicitou a colaboración para poder ampliar a Casa consistorial co obxectivo de dispor de máis espazo para dotar a este edificio de novas oficinas. Dende o Goberno municipal están traballando para presentarlle un anteproxecto á Xunta de Galicia. Blas García abordou con Alfonso Rueda posibles vías de financiamento para poder executar dito proxecto de ampliación da Casa do Concello.

Construción dunha pista de atletismo
No eido deportivo, solicitouse o apoio da Xunta de Galicia para construír unha pista de atletismo por módulos no antigo campo de fútbol de Ventín. Na actualidade, neste lugar existe unha gaiola de lanzamentos. O obxectivo é construír neste lugar unha pista de atletismo por fases. Na seguinte fase instalaríase unha pista de saltos. Para iso solicitouse o apoio económico da Xunta. Ames é un concello cun gran número de persoas mozas que practican deporte. Ademais, no concello hai varios clubs de atletismo, polo que a construción desta instalación deportiva favorecería a practica do atletismo e dos adestramentos de ditos clubs.

Brigada de limpeza do medio natural
Outro dos asuntos tratados foi a concesión dunha axuda, que vén de solicitar o Concello de Ames a través da Concellaría de Transición Ecolóxica e de Medio Ambiente, para contratar unha brigada formada por tres persoas para a limpeza do medio natural (pistas forestais e entorno fluvial). Esta axuda enmárcase no Fondo de compensación ambiental e está en fase de tramitación da posible concesión.

Mellora de varios tramos dos Camiños de Santiago
Por último, tratouse o proxecto que recolle a posible mellora no entorno dos Camiños de Santiago que pasan por Ames. O obxectivo é executar melloras de carácter paisaxístico e de seguridade en varios puntos do Milladoiro, Ventosa e Augapesada.

Novas relacionadas:

El Correo Gallego: "Rueda respalda el servicio de bomberos comarcal"

La Voz de Galicia: "Xunta, Diputación y Concello de Santiago retoman el debate sobre el parque de bomberos"

Revista Ames Go: "Concello e Xunta tratan asuntos comúns nunha reunión entre Blas García e Alfonso Rueda"