Esta semana, varios grupos de alumnos e alumnas de do CEIP A Maía visitaron as instalacións do Concello de Ames. Os primeiros en achegarse ata a casa consistorial foron os 62 nenos e nenas de terceiro, o luns 19, mentres que os seus 67 compañeiros de cuarto fixeron esta visita onte, 20 febreiro. O alumnado de ambos curso desprazouse ata a Casa do Concello para coñeceren da man de parte do Goberno local como funciona unha administración municipal.

A rapazada do colexio amesán chegou ás dependencias locais ben preparada, con moitas preguntas e suxestións listas, xa que nas últimas semanas viñan de cursar a administración local nas súas clases, tal e como comentou o profesorado do centro.

Así, o salón de plenos foi o lugar escollido para que o alumnado trasladase as súas dúbidas a parte do Goberno local, co que mantiveron unha xuntanza. Acompañando á rapazada de terceiro de primaria estiveron o alcalde de Ames, Blas García e todos os concelleiros que conforman o goberno municipal. Ademais, estiveron presentes Oliva Agra e Pablo Beiroa, concelleiros do Partido Popular de Ames; e Escarlata Pampín e Rosalía Seijas, do BNG de Ames.

Deste xeito, trataron de resolverse varias dúbidas e inquedanzas que o alumnado traía preparadas, como que se decide nos plenos, se pode asistir público, ou a dificultade que ten o traballo dos concelleiros.

Outra das cuestións de maior interese foi o tema dos tributos e dos orzamentos, que foi explicado a través dos servizos de conciliación municipais, xa coñecidos por unha meirande parte dos nenos e nenas xa coñecen. Aínda así, un dos momentos máis destacados foi cando as visitantes puideron ver e suxeitar o bastón de mando do alcalde.