O auditorio de Bertamiráns volverá a acoller este venres unha nova estrea de artes escénicas. Desta vez, coa representación de “As desterradas”, da compañía teatral Producións Teatrais Excéntricas, unha peza que reconstrúe e pon en valor a historia de resistencia dunha comunidade de mulleres autosuficientes e poderosas

Sinopse de “As desterradas”
Nesta obra, ambientada no século XVI, Carme Varela narra a historia dunha pequena comunidade de monxas á beira do miño que se ven ameazadas pola cobiza da xerarquía eclesiástica. Os señores da Igrexa buscan rematar coa resistencia das freiras e non dubidan en comezar a difamalas e ameazalas por todos os medios. A vida das monxas semella continuar coas súas rutinas habituais, mais a ameaza exterior está a piques de chegar ao convento de Albeos.

Deste xeito, plásmase e dáselle voz á realidade que vivían naquel momento as comunidades de mulleres autosuficientes, poderosas por si mesmas e que se resistían a seguir un sistema de opresión contra elas.

Sobre Producións Teatrais Excéntricas
Con máis de dúas décadas de experiencia sobre os escenarios e numerosos premios ás súas costas, Producións Teatrais Excéntricas é un proxecto no que o humor e a comedia xoga un papel fundamental de forma irónica e crítica. Así mesmo, a compañía serve como plataforma de creación dos espectáculos unipersoais de Quico Cadaval e os musicais de Piti Sanz.

Ao longo destes anos, a compañía realizou representacións por teatros e festivais de diferentes países. Así mesmo, recibiron numerosos recoñecementos e premios polas súas obras, destacando varios premios María Casares ou o Premio de Honra Roberto Vidal Bolaño ao Mérito nas Artes Escénicas no 2017.

Coloquio desta tarde
Na tarde deste mércores, 26 de marzo, o Pazo da Peregrina de Bertamiráns acollerá un coloquio aberto á veciñanza sobre “As desterradas”. Nesta charla participarán Carme Varela, a propia escritora da obra, e Quico Cadaval, director da representación. A actividade terá lugar ás 19.00 horas e a entrada será libre ata completar aforo. Este encontro é unha actividade de mediación que realiza a compañía Producións Teatrais Excéntricas por estar a realizar unha residencia artística no noso concello.