Un ano máis o Concello de Ames, a través da Concellaría de Comunicación, pon en marcha o proxecto Radio Cidadá, no que a emisora municipal abre as súas portas aos veciños e veciñas de Ames e da contorna para conducir os seus propios programas. Trátase dunha iniciativa posta en marcha no ano 2017 e que chega a súa oitava edición. Ames Radio é unha das poucas emisoras municipais, por non dicir a única, que ofrece este servizo público para que a veciñanza, que así o desexe, poida presentar os seus propios proxectos de programas de radio.

Este ano mantéñense nove das propostas, que xa se integraran na grella de edicións anteriores: Apuesta por el Rock and Roll, Vaide retro, De museo, Miradas, O protocolo é para todos, Tangos de la esquina sur, Las carabelas del siglo XXI, La hora de la columna e El cuerpo que habitamos. Todas elas son espazos consolidados xa coñecidos pola audiencia de Ames Radio.

Apuesta por el Rock and Roll é un programa de Chelsea Runaway no que repasa grandes clásicos do rock and roll, pero tamén lle dá cabida a novas bandas do panorama galego, nacional e internacional. Vaide retro, dirixido por Álvaro Sempere, é unha volta ao pasado, principalmente ás décadas dos 80 e 90, no que se aborda como era a vida, as series, as películas ou a música naqueles anos. De museo, de Rosa Martínez, é un programa sobre historia no que se abordan diferentes aspectos relacionados coa cultura e arte galegas.

En Miradas, un programa de Perla Alonso, destácanse realidades ou obxectos aos que non lle prestamos a suficiente atención. O protocolo é para todos é un programa de Margarita Murillo no que non só se dan claves sobre o protocolo, senón que nel abórdanse outras cuestións relacionadas coa actualidade. Tangos de la esquina sur, de Daniel Rilo, pon nas ondas de Ames Radio o tango dende diferentes perspectivas e dende diferentes partes do mundo. Las carabelas del siglo XXI está dirixido por Francisco Javier Salas e fala sobre integración. La hora de la columna é un programa de Miguel Fachado e Alberto Ogando, no que se fala de moda, sociedade e actualidade do mundo do corazón. El cuerpo que habitamos, é un espazo sobre benestar conducido pola comunicadora social Martha Franco, que busca afondar na relación corpo-mente e nas emocións.

Novos programa de radio cidadá
Ademais, nesta nova convocatoria hai seis novidades: Conta con Nós, un programa de Manuel Aguilar, que conta coa colaboración de Esther Souto, María del Carmen Vites e María Covadonga López, da delegación na provincia da Coruña da Asociación Española Contra o Cancro; Souvenir, dirixido por Miguel Arce, no que se fai un repaso da actualidade e da sociedade; Teresa & Cia, programa dirixido por Teresa Abalde, espazo no que a modo de consultorio se achegan consellos e se abordan temas da vida cotiá; Voces invisibles, de Iría Tojo, un espazo no que se dá voz a mulleres silenciadas ao longo da historia; Ames en Dixital, programa no que Isabel Viñas dá as claves para achegar o mundo dixital á veciñanza e ás empresas; e NaturAmes, de Marcos Estévez e Ángeles Montecelo, no que se fala sobre natureza e persoas.

Programas semanais, quincenais e mensuais
Este ano son catro os programas que se emiten en Ames Radio cada semana: Tangos de la esquina sur, os venres ás 21:30 horas (remisión os sábados ás 16.00 horas); Las carabelas del siglo XXI, os sábados ás 10:00 horas (remisión os domingos ás 11.00 horas); La hora de la columna, os martes ás 19.30 horas (remisión os mércores ás 11.30 horas); e Teresa & Cia, os mércores ás 19.00 horas (remisión os xoves ás 11.00 horas).

Outros sete programas poden escoitarse de xeito quincenal: Souvenir, os martes ás 19.00 horas (remisión os domingos ás 11.00 horas); Vaide retro, os mércores ás 19.30 horas (remisión os xoves ás 11.30 horas); Voces invisibles, os mércores ás 19.30 horas (remisión os xoves ás 11.30 horas); O protocolo é para todos, os xoves ás 18.30 horas (remisión os venres ás 11.00 horas); Ames en Dixital os xoves ás 19.00 horas (remisión os venres ás 11.00 horas); De Museo, os xoves ás 19.30 horas (remisión os venres ás 11.30 horas); El cuerpo que habitamos, os xoves ás 19.30 horas (remisión os venres ás 11.30 horas).

O resto de programas teñen unha emisión mensual: Conta con Nós, os luns ás 19.00 horas (remisión os martes ás 11.00 horas); Apuesta por el Rock and Roll, os martes ás 18:30 horas (remisión os mércores ás 10.30 horas); Miradas, os mércores ás 21:30 horas (remisión os xoves ás 10.30 horas); e NaturAmes, os venres ás 19.30 horas (remisión os sábados ás 10.30 horas).