O apalpador visitará Ames o vindeiro venres 13 de decembro, ás 18.00 horas na Casa da Cultura de Bertamiráns. A visita, enmarcada dentro do programa Apego, contará tamén coas actuacións musicais da Banda da Montaña e Cé Orquestra Pantasma. Para asistir, é preciso facer unha inscrición previa enviando un correo ao enderezo normalizacion@concellodeames.gal, indicando nome e apelidos dos asistentes, idade dos cativos e un teléfono de contacto. O prazo está aberto desde o día 6 ata o vindeiro xoves 12 de decembro.
O apalpador, figura ligada á tradición do Nadal en Galicia, identifícase por tocarlles o ventre aos cativos para comprobar se comeron dabondo ao longo de todo o ano, ademais de deixar algún agasallo xunto cunha presada de castañas. Desta volta, o apalpador volverá a Ames para dar comezo ao Nadal cargado de contos, cantos e agasallos para a rapazada. Ademais, tamén recollerá as cartas que a rapazada queira deixar.
A visita será na Casa da Cultura de Bertamiráns o venres 13 de decembro, ás 18.00 horas, e contará tamén cos contos e cantos de Anxo Moure e as actuacións da Banda da Montaña coa Cé Orquestra Pantasma.
A actividade forma parte do programa Apego, unha iniciativa colaborativa entre varios concellos, incluído Ames, dirixido ás familias que estean a esperar un novo membro na familia ou ás que teñan crianzas de ata 6 anos. O obxectivo é promover e normalizar o uso da lingua galega no ámbito familiar.
Inscricións
As inscricións para participar están abertas desde o día 6 ata o vindeiro xoves 12 de decembro. É preciso mandar un correo electrónico a normalizacion@concellodeames.gal co nome e apelido das persoas que asistan, a idade das crianzas que participarán e un teléfono de contacto.
Nesta ligazón pode descargarse a carta de Nadal que os cativos desexen entregarlle ao apalpador, e nesta outra ligazón as posibles propostas de agasallos que poden pedir.
