O Concello de Ames, a través do departamento de Bibliotecas Municipais,  continúa neste mes de abril, no que se conmemora o Mes do Libro, coas sesións enmarcadas dentro do programa “Encontros Literarios”, unha actividade que ten como obxectivo difundir e promover literatura en galego, xunto con dar a coñecer novos autores ou escritores da contorna de Ames.

“Cuarto vértice” de Carlos Moreno
A obra protagonista deste encontro é “Cuarto vértice”, a segunda novela do lugués Carlos Moreno Lugrís que, ademais de dedicarse ao mundo da literatura, exerce como médico. Neste libro nárrase a historia de dúas mulleres que se cruzan nun momento moi concreto das súas vidas e que, ambas as dúas, son moi diferentes entre si, pero que comparten iniciais (M.M.): Maruja Mallo e Marina Méndez.

Ao longo da obra, Maruja cóntalle a Marina a súa extensa carreira no mundo da arte, que abrangue dende os anos vinte ata os oitenta. Pola outra banda, Marina tamén lle narra a súa historia, na que se inclúe todo o acoso recibido por unha institución creada na época franquista, El Patronato de la Mujer.

Deste xeito, cunha narración de corte autobiográfico, faise un paralelismo entre a vida de ambas e búscase reivindicar o importante papel de Maruja Mallo na historia e situala como o cuarto vértice do “polígono” que formou na súa época xunto con outros autores do momento como Lorca, Buñuel e Dalí.