A Escola Infantil Municipal do Bosque elixiu como temática de Entroido para este ano as flores. A escola conta con oito aulas diferentes, e cada unha delas foi dunha especie de flor diferente. Desta maneira, os pequenos e pequenas foron realizando os seus propios disfraces na aula durante os días previos á celebración.

Chegado o 21 de febreiro, as nenas e nenos da escola celebraron o Entroido pola mañá coas súas profesoras, con música, bailes e piñata. Mentres que pola tarde, as familias sumáronse á celebración, asistindo, se o querían, disfrazadas. Nunha tarde no que o bo tempo acompañou, a festa tivo lugar no patio, onde houbo merenda de pratos típicos de Entroido e moita festa.

En canto á Escola Infantil Municipal da Madalena, as crianzas foron preparándose durante toda a semana para a festa do venres. Cada día da semana foron levando algún tipo de complemento ou accesorio de Entroido, e o xoves, tanto alumnos/as como profesoras asistiron á clase disfrazados en pixama.

Ao igual que no Bosque, o venres desfrutaron da súa festa de entroido. Pola mañá, realizaron o seu propio desfile na escola, tendo como temática os insectos. Así, cada clase disfrazouse dun bicho diferente: arañas, formigas, grilos, bolboretas... E xa pola tarde, tivo lugar a festa cos pais e nais con música e comida de Entroido coa que colaboraron as familias. Unha celebración do máis animada xa que este ano foron moitos os papás e mamás que se animaron a disfrazarse cos seus pequenos e pequenas.