O Club Atletismo MillaRaio estivo representado no campionato de España sub18 ao aire libre individual, que se celebrou en Xerez da Fronteira os días 18 e 19 de xuño. Neste senso, o atleta Daniel Cariñena vén de realizar unha das mellores actuacións da tempada, ao rematar oitavo na clasificación final do salto de lonxitude.

O atleta, nado no 2005, realizou un gran concurso, conseguindo tres marcas que superaron os 6,5 metros, e que lle permitiron meterse na mellora da proba. Finalmente, o gañador da proba foi Ángel Negre, do Playas de Castellón, que conseguiu unha marca de 6,99 metros.

Cariñena inaugurou a súa participación nesta tempada en campionatos nacionais o pasado mes de marzo, no que estivo no campionato de España sub18 en pista cuberta, celebrado en Valencia. Alí rematou undécimo no salto de lonxitude, cun mellor salto de 6,43 metros, que se viu lastrado por unhas molestias físicas.

Ademais, tamén participou o 4 de xuño coa selección galega no campionato de España sub18 de Federacións Autonómicas, competindo na proba de salto de lonxitude e nas remudas 4x100m. Dende febreiro, Cariñena é campión galego sub18 de pista cuberta en salto de lonxitude, cunha marca de 6,75 metros.

Novas relacionadas:

AMSGO!: "Daniel Cariñena, do MillaRaio, oitavo en salto de lonxitude no Campionato sub18 español"