As clases presenciais da Escola Municipal de Música de Ames quedaron suspendidas cando se declarou o estado de alarma. Pero isto non foi impedimento para que a música seguira soando.

Durante estes meses, o persoal docente da EMMA realizaron clases por videoconferencia para seguir practicando algunhas pezas cas alumnas e alumnos. Ademais enviáronse tarefas e materiais ao alumnado a través da aplicación TokApp.

Posteriormente, as alumas e alumnos, co apoio das súas familias, gravaron como tocaban as pezas e as enviaron aos seus profesores/as, os cales tamén gravaron unha peza conxunta. Agora, despois da edición dos vídeos por parte do persoal docente, todos podemos desfrutar do gran talento da EMMA a través dos vídeos que xa están subidos a Youtube, que abarcan unha versión de “Secrets” de One Republic, o grande éxito de Queen “Dont stop me now”, “Volveremos a brindar” de Lucía Gil ou unha nova versión da xa coñecida canción desta corentena: “Resistiré”.

Ademais, Patricia Cadaveira, directora da EMMA, adiántanos que “debido a esta situación non podemos realizar o festival de fin de curso da Escola de maneira presencial, pero temos pensado realizar un festival de música online para o día 19 de xuño, que é cando o faríamos normalmente”.