O inicio do mes de abril trae consigo en Ames, de novo, unha nova edición do ciclo de cinema Abril de Cine. “Prefiro condenarme”, de Margarita Ledo, será o filme que inaugure unhas xornadas que pretenden achegar o cinema galego actual á veciñanza. A proxección terá lugar este xoves, 3 de abril, no auditorio do Milladoiro, ás 20.00 horas. Tras a visualización da película, haberá un pequeno coloquio coa directora do filme para afondar nos aspectos máis rechamantes da obra audiovisual.

Sobre “Prefiro condenarme” e Margarita Ledo
A primeira das sesións terá lugar o vindeiro xoves 3 de abril coa película “Prefiro condenarme”, dirixida por Margarita Ledo, recoñecida xornalista, cineasta e escritora galega. Comezou no mundo da prensa escrita, traballando na redacción de El Ideal Gallego e fundando, anos máis tarde, o semanario A Nosa Terra e a revista Escrita.

A partir dos anos 80 foi cando comezou no mundo da investigación e afondou máis no ámbito da escritura. A partir do ano 2000 iniciou o seu primeiro proxecto cinematográfico, con Santa Liberdade. Dende entón, recibiu numerosos premios e recoñecementos polo seu labor no mundo audiovisual, destacando o Premio Otero Pedrayo recibido no 2017, pois foi a primeira muller en recibir este galardón.

En canto a “Prefiro condenarme”, estreada o pasado 2024 e galardoada no Festival de Sevilla e no Locarmo Pro, o filme narra a historia de Sagrario, unha mariscadora da ría de Ferrol que afronta un xuízo por adulterio aos seus 33 anos debido á filla que ten co seu amante, un carpinteiro “digno de querer”. Ambientada aínda en tempos de ditadura franquista, 1972, amosa a crúa realidade dun tempo cunha forte opresión e falta de dereitos.

Dúas sesións de longametraxes e unha noite de curtas
Así mesmo, todas as proxeccións son en galego e nesta edición do Abril de Cine estarán presentes as directoras e directores de cada un dos proxectos. Cada un deles participará nun pequeno coloquio ao finalizar cada filme para afondar nos aspectos máis rechamantes da súa obra audiovisual. Así mesmo, ao inicio haberá unha pequena presentación para orientar ao público cun par de claves sobre o filme antes da proxección. Ademais, todas as xornadas do ciclo de cine se realizarán no auditorio do Milladoiro ás 20.00 horas. As entradas para asistir ás xornadas do Abril de Cine poden mercarse a través da Billeteira electrónica.

A segunda das xornadas de cinema desenvolverase o xoves 10 de abril, coa proxección “Filmei paxaros voando”, de Zeltia Outeiriño González, cineasta galega que comezou a desenvolver a súa carreira no mundo audiovisual en Cataluña e que, a día de hoxe, realizou varios documentais recoñecidos en diversos festivais. Nesta ocasión, o documental presenta unha parte autobiográfica, na que a propia Zeltia volta a Galicia, tras dúas décadas traballando en Barcelona, para narrar a historia do seu tío Antonio, un artesán téxtil que viviu intensamente nos anos 80. Neste retorno, Zeltia reencóntrase con súa nai, coa cal acaba compartindo momentos de complicidade e amor a pesar de non partir dunha boa relación.

Na última das sesións, que se realizará o martes día 22, as protagonistas serán as curtametraxes. Por un lado, “Platónico, platónica”, de Xacío Baño, na que se fai unha reflexión e conexión profunda entre o amor e a intelixencia artificial.

Outra das curtas que se proxectará nesta sesión será “Noites de prata” de Soraya Antelo, un proxecto, finalista nos Premios Mestre Mateo deste pasado 2024, que narra a historia de como Lola, unha cantante de boleros, abandonou Galicia polas terras do Río da Prata. A terceira das curtas será “Carracedo” de Manu Lucas Mariño, un documental que amosa a vida agochada tras o lutier contemporáneo membro do grupo galego De Ninghures.

A última das curtas que se proxectará nesta sesión será “Pechar caixas, abrir caixas” de Hugo Amoedo, un filme na que se narra a historia da volta a Galicia do escritor Xavier Queipo despois de máis de 30 anos en Bruxelas.

Novas relacionadas:

La Voz de Galicia: "Ames inicia este jueves Abril de Cine con «Prefiro condenarme»"

AMSGO!: "“Prefiro condenarme” inaugura unha nova edición do ciclo Abril de Cine"