Dende a Asociación veciñal de Covas, consideran que recuperar a memoria histórica é recoñecer o noso pasado como elemento fortalecedor da nosa identidade, por iso a mostra é de gran interese. Así, fainos lembrar tempos atrás, como eramos, como eran as nosas familias, como eran os torreiros, as leiras, a escola, a igrexa... Compartindo lembranzas e afianzando o futuro.

As imaxes que compoñen a exposición percorren un período de tempo de 80 anos, sendo as máis antigas do 1900 e as máis recentes do 1980. Nela pódense apreciar imaxes das familias Ruanova Carbia, García Castro, Pose Gutierrez, Lemos González, Fuentes Carballal, Rodríguez Lemos, Vázquez Noya, Martínez López, Barreiro Caxade, Viaño García e Lemos Martínez.

Un integrante da asociación de veciños, Paco Fuentes , explica que a exposición naceu como unha iniciativa da asociación para que “quedara algo para a xuventude e o día de mañá saiban como vivía a xente en anos atrás”. Ademais, explica que “ao primeiro, as familias víanse indecisas a entregalas porque non pensaron que ía ser así, pero unha vez vistas é diferente... agora temos moitas máis fotografías e se acordamos facer unha nova exposición con elas imos a facela a continuación desta”.

O concelleiro de Patrimonio Histórico, David Santomil, estivo cos integrantes da Asociación veciñal de Covas no momento da montaxe de dita exposición. O Concello de Ames colabora nesta mostra, que contribúe a recuperar e manter o patrimonio histórico de Ames, e en especial da parroquia de Covas. Dende a asociación agradecen a colaboración de todas as familias que cederon desinteresadamente un anaco das súas vivencias para compartilas con nós, pois sen todas elas non será posible esta exposición.