A celebración das festas da Peregrina en Bertamiráns continúa este venres, 9 de agosto, da man de Guadi Galego, unha das artistas máis relevantes da escena musical galega das últimas décadas. Así, a cantante de Cedeira actuará ás 22:00 horas no parque do Ameneiral, en Bertamiráns, onde presentará o seu novo espectáculo “Síntese horizonte”, expresamente concibido para representar ao vivo sobre as táboas do escenario.

“Síntese horizonte”: o poder transformador da música ao vivo
Este proxecto é unha aposta da propia Guadi Galego pola evolución do seu son, na que amosa todo aprendido e desaprendido ao longo da súa traxectoria musical.

Deste xeito, acompañada dunha portentosa banda e dunha produción que destaca pola súa coidada iluminación e posta e escena, confirmará o que o público desexa ver, sentir e escoitar: a firme crenza no poder transformador da música en directo.

Guadi Galego
A súa andaina musical comezou sendo ela moi nova, un camiño fíado especialmente a Berrogüeto como vocalista, pianista e gaiteira, e que, co tempo, deu paso a outros proxectos máis persoais, como Espido ou Nordestin@s.

No 2009 iniciou a súa carreira en solitario con Benzón, ao que lle seguiron éxitos como   Lúas de Outubro e Agosto,  Inmersión, Costuras ou, máis recentemente, Roibén, un LP que presentou en diferentes puntos da xeografía peninsular.

Logo de Roibén (2022) e dunha simbólica ausencia nos escenarios do país, Guadi Galego segue a atravesar etapas e dá paso a novos horizontes, sen esquecer que a vida existiu e persiste nela. Neste 2024 aposta pola evolución do seu son co proxecto “Síntese horizonte”, pois con cada disco, e con cada espectáculo, a artista foi aprendendo a desaprender do establecido.

Novas relacionadas:

El Correo Gallego: "Guadi Galego presentará este venres "Síntese horizonte" en Bertamiráns"

La Voz de Galicia: "Guadi Galego, la protagonista de la noche del viernes en Bertamiráns"

El Correo Gallego: "Guadi Galego xunta mil cinconcentas persoas no parque do Ameneiral"