A homenaxe, como no ano anterior, desenvolveuse no Salón de Plenos do Concello de Ames, sen que finalmente puidera ter lugar o acto de brinde de Nadal, que foi cancelado tras anunciar a Consellería de Sanidade a prohibición de eventos de pé con aperitivos. Malia esta cancelación, mantívose a celebración do acto, no que cinco traballadores e traballadoras municipais recibiron o recoñecemento do Concello e un pin conmemorativo como pequeno agasallo.

Ao acto, ademais do persoal homenaxeado, asistiron representantes do Goberno local, os voceiros e voceiras de todos os partidos da Corporación municipal e dos sindicatos. Participaron, do Goberno local, o alcalde de Ames, Blas García, así como os concelleiros e concelleiras David Santomil, Genma Otero, Víctor Fernández, Ana Belén Paz, Natividade González, Susana Señorís, Beatriz Martínez e Escarlata Pampín. En representación dos demais partidos da Corporación, asistiron Oliva Agra, do PP; Quique Costas, de Ames Novo, e José Ramón Oulego, de Cidadáns. Ademais, en representación dos sindicatos, participou Rubén Ramos, da Oficina de Voluntariado.

Durante o evento, foron recoñecidas cinco traballadoras e traballadores que cumpriron 25 anos de servizo, que comezaron a traballar no concello entre o ano 1995 e o 1996. A persoa homenaxeada de maior antigüidade foi Pablo Moure, da Policía Local, que comezou a traballar en Ames en setembro do 1995 e que recibiu o seu agasallo de mans de Víctor Fernández, concelleiro de Administración Xeral e Persoal.

Do Departamento de Cultura, foi recoñecido José Lagares Piñeiro, no concello dende xaneiro de 1996, por parte da propia concelleira, Natividade González. Pola súa banda, o conserxe do IES de Ames, Vicente Fernández, recibiu o seu agasallo do concelleiro de Educación David Santomil, polo seu traballo dende marzo de 1996.

Mónica Agrafojo, telefonista do concello e traballadora dende agosto de 1996, recibiu a súa homenaxe por parte da concelleira de Atención Veciñal, Susana Señorís. Por último, Teresa Zapata, técnica do Departamento de Bibliotecas, veu recoñecida a súa labor dende decembro de 1996 pola concelleira de Economía e Facenda, Genma Otero.

O alcalde de Ames, Blas García, quixo gabar a labor do persoal técnico de Ames, así como a súa entrega durante diferentes mandatos e cores políticas. “O verdadeiro motor do concello son elas e eles, xa que nós estamos de paso, pero os e as traballadoras seguirán estando. Teresa, Mónica, Lagares, Vicente e Pablo levan unha gran parte da súa vida ao servizo da veciñanza, e é de agradecer e poñer en valor o seu traballo e a dedicación”.

Novas relacionadas

La Voz de Galicia: "Ames homenajea al personal que cumple 25 años trabajando"

El Correo Gallego: "Tributo a cinco traballadores municipais tras vintecinco anos"

Compostela 24 Horas: "Homenaxeadas cinco traballadoras e traballadores que cumpren 25 anos de servizo no Concello de Ames"