“O seu compromiso e a luz de Rosalía seguen sendo imprescindibles hoxe e sempre para avanzarmos como pobo”, manifesta a concelleira de Normalización Lingüística, Escarlata Pampín. Rosalía como luz, como faro, como guía de actitude e de pensamento. Nesta ocasión o soporte para espallar as verbas de Rosalía serán os farois das zonas máis transitadas de Bertamiráns e do Milladoiro. De aí, “A luz de Rosalía”, o nome co que se denomina a campaña.

O alumnado de infantil e primaria do concello, escribiu e pintou estas lonas poéticas sobre os PVC que previamente entregou nos centros educativos o Servizo de Normalización Lingüística. A rapazada abeirou aos versos da poeta ríos, flores, paxaros, arbores, casiñas e campanarios, provocando que cada unha dos traballos amose a creatividade da que fan gala os nenos e as nenas de Ames. En cada lona sinálase ademais a aula que o realizou e o colexio ao que pertence.

Participan no proxecto o CEIP Agro do Muíño, os CEIP de A Maía, Barouta e Ventín, a Escola Infantil do Milladoiro e as escolas unitarias de Covas e da Tarroeira. A exposición urbana estará definitivamente instalada o día 22 de febreiro e alongarase até o 7 de marzo.

“Os obxectivos centrais desta intervención son revitalizar o pensamento, a figura e a obra de Rosalía de Castro, pór en valor o vínculo da escritora co concello e achegar referentes públicos que contribúan a recoñecer a nosa lingua como expresión xenuína das galegas e galegos”, manifesta a concelleira de Normalización Lingüística, Escarlata Pampín.

Redes de colaboración cos centros de ensino
“Ademais -engade Pampín- con esta acción afianzase o obxectivo de establecer redes de colaboración entre e cos centros de ensino do concello ao tempo que se socializa o traballo da comunidade educativa amesá e se sensibiliza sobre o respecto e o coidado do noso patrimonio natural e cultural.

O Servizo de Normalización Lingüística e os equipos de Dinamización da Lingua Galega dos centros educativos de infantil e primaria do concello levan varios anos abordando accións que axuden a afianzar o coñecemento dos rapaces e rapazas da figura obra e pensamento de Rosalía de Castro desde as idades máis temperas. E que, ao mesmo tempo, sirvan para facer presente a figura da poetisa entre a cidadanía amesá. Aínda se poden ver e parques e xardíns, as lousas cos versos rosalianos que pintou a rapazada anos atrás. Tamén tiveron moita repercusión os cartaces que pegaron nos portais e os traballos que amosaron nos escaparates a través da campaña “As fiestras de Rosalía”.