O Teatro Principal de Santiago de Compostela acolle mañá, 3 de abril, ás 11:00 horas, a entrega de premios da sétima edición do certame Enreguéifate, o proxecto impulsado polos concellos de Ames, Carballo, Pontevedra, Santiago de Compostela e Teo para impulsar a difusión da improvisación oral en verso (regueifa).

Este acto, que será accesible en lingua de signos, estará conducido polo mestre e músico Manolo Maseda, o mestre e escritor Séchu Sende, e as formadoras do Enreguéifate Lupe Blanco, Josinho da Teixeira e Nuria das Cruces. Tamén haberá música en directo da man da Orquestra da Regueifa, formada por alumnado do IES do Milladoiro de Ames e o IES Antonio Fraguas de Santiago de Compostela.

Así mesmo, na gala participarán, ademais das persoas premiadas, alumnado de varios centros escolares galegos, técnicas dos servizos de normalización lingüística e unha representación política dos concellos impulsores da iniciativa. O alcalde de Ames e concelleiro de Normalización Lingüística, Blas García, tamén asistirá ao acto.

Vídeos gañadores
Estas son os vídeos gañadores, que poden verse na web do certame ou na canle de Youtube:

Categoría xeral:

• A máis brava: ARRIEIRO E CHAMINHO “Cumbia do choque”.
• A máis aguda: ESCOLA DE REGUEIFA DE CARBALLO “Vai de voda”.
• A máis diversa: TEISEIROS REGUEIFEIROS “Regueifa pola saúde mental”.
• A máis reivindicativa: IVÁN E AROA “Regueifa de coidar a terriña”.
• A mellor cantada: GRUPO XUVENIL DA TERCEIRA IDADE DE POIO “Sempre vida”.
• A mellor falada: AS DA MUIÑEIRA “Os deberes”.

Categoría escolar:

• A máis brava: OS MÁIS BRAVOS “Queremos moito ás nosas profes”. Alumnado do CEIP de Bormoio-Agualada (Coristanco).
• A máis aguda: REGUEIFEIRXS DA CHÁ “Regueifando apréndese mellor”. Alumnado do IES Santiago Basanta Silva (Vilalba).
• A máis diversa: 2o B QUIROGA PALACIOS “O noso Entroido”. Alumnado do CEIP Pluringüe Cardeal Quiroga Palacios (Santiago de Compostela).
• A máis reivindicativa: 6o E.P. CEIPP SANTA MARÍA DO CASTRO “O granulado non é pasado”. Alumnado do CEIP Plurilingüe Santa María do Castro, Cabo de Cruz (Boiro).
• A mellor cantada: REGUEIFEIRAS DO CAMBALLÓN “A nosa música na nosa voz”. Alumnado do IES Marco do Camballón (Vila de Cruces).
• A mellor falada: REGUEIFEIROS DE RAZO “Regueifa en Razo”. Alumnado do CEIP Plurilingüe Nétoma-Razo (Carballo).

Ademais, o xurado acordou ademais conceder un accésit á Regueifa máis inclusiva a NOA E MARTÍN polo vídeo “Todo isto son mentiras” (IES Antonio Fraguas, Santiago de Compostela).

56 vídeos presentados
Esta cerimonia de entrega de premios será o broche final dunha edición na que se recibiron un total de 56 vídeos chegados das catro provincias galegas (Ames, Carballo, Pontevedra, Santiago de Compostela, Teo, Vigo, Vilalba, A Coruña, Viana do Bolo, Melide, Vila de Cruces ou Dodro, entre outros municipios).

O xurado do certame estivo composto por Carme Pereiro, normalizadora lingüística do Concello de Carballo; Fátima Souto, do Servizo de Normalización Lingüística do Concello de Ames; e os docentes Manolo Maseda e Séchu Sende.