No pasado mes de outubro o Goberno municipal mantivo unha xuntanza con representantes do sector audiovisual que teñen empresas radicadas en Ames. O obxectivo de dita reunión foi o de establecer un primeiro contacto para no futuro establecer colaboracións que sexan beneficiosas tanto para os profesionais como para o Concello. Seguindo esta liña de traballo o alcalde e maila concelleira de Promoción Económica visitaron as instalacións da empresa Ficción Producciones que se atopa no parque empresarial Novo Milladoiro.

A visita serviu para fixar un novo contacto e buscar vías de comunicación e colaboración entre esta empresa e mailo Concello de Ames. Alcalde e concelleira coñeceron as instalacións da produtora e mantiveron unha xuntanza con Julio Casal, xerente da empresa, e Toni Veiga, director de produción. Deste xeito, falouse dunha posible colaboración para traballar en futuros proxectos en común, que sirvan para poñer en valor tanto ao concello de Ames como ao sector audiovisual que está implantado no noso municipio, e que se diversifica en varios ámbitos.

Cómpre destacar que Ficción Producciones naceu en maio de 2003 como empresa independente adicada á produción audiovisual de contidos de ficción e de animación para o mercado nacional e internacional. Está constituída por un equipo humano creativo con ampla formación empresarial. Con máis de 18 anos de experiencia conseguiu un constante crecemento e posicionamento no sector.

Nos últimos anos ademais de contidos de ficción, a empresa dedicou un grande esforzo económico e profesional na área de animación considerando que Galicia pode xerar unha importante industria neste sector. Como exemplo deste impulso e desenvolvemento, Ficción Producciones estreou no ano 2014 “Meñique”, a primeira longametraxe de animación 3D Cuba-España, que supuxo un éxito rotundo no país cubano e conseguindo a nominación na edición dos Premios Goya 2015.

Na actualidade, Ficción Producciones continúa inmersa na produción de grandes proxectos e procura constante de talento, coprodución e investimento. Un esforzo constante que leva a Ficción Producciones a desenvolver un considerable traballo que día a día dá os seus froitos.

O alcalde de Ames, Blas García, explica que “resulta moi positivo coñecer polo miúdo o traballo que realiza esta empresa que dispón de gran experiencia no sector audiovisual. Esta visita fixémola despois da xuntanza mantida no pasado mes de outubro con representantes de varias empresas do sector audiovisual. Queremos establecer un contacto estreito e permanente de xeito que tanto nós como as produtoras podamos favorecernos desta sinerxia”.

Por outra banda, a concelleira de promoción Económica, Ana Belén Paz, destaca o peso que teñen as empresas do sector audiovisual e de novas tecnoloxías dentro do tecido empresarial do parque empresarial do Novo Milladoiro e de Ames en xeral. “É un privilexio contar con tantos e tan bos profesionais do audiovisual, como tamén o é que grazas aos seus traballos Ames se coñeza un pouco máis alén das nosas fronteiras”.

Novas relacionadas:

El Correo Gallego: "Plantexan colaboracións audiovisuais coa empresa Ficción Producciones"

Enfoques: "El Concello de Ames continúa buscando sinergias con las empresas del sector audiovisual de Novo Milladoiro"