A praza de Manuel Murguía encherase este sábado, 5 de agosto, de música flamenca da man do trío Tacón Gitano, con motivo das festas da Madalena. A agrupación interpretará tangos, bulería, soleá, rumba... Composto por Moisés Fernández (caixón flamenco), Isaías Salazar (bailaor) e Rubén Fernández (guitarra e voz), o grupo busca ofrecer un espectáculo no que o público poida descubrir todas as vertentes do flamenco. A actuación comezará ás 21:00 horas.

Por outra banda, Pitusa Semifusa, o espectáculo que terá lugar na mesma localización o día 7 de agosto, é unha actuación musical e de teatro pensada para o público infantil. Trátase dunha actividade participativa na que Pitusa Semifusa (Xiana Lastra), a súa avoa (Olga Brañas) e o seu irmán (Sergio Tannus) irán explicándolles aos nenos e nenas distintos aspectos dos instrumentos musicais e da familia á que pertence cada un. Desenvolverase a partir das 19:30 horas.

A concelleira de Promoción Económica, Ana Paz, sinala que “estes días poderemos gozar no Milladoiro de novas actuacións do AmesON de verán, o programa de música na rúa que está recorrendo un ano máis os dous núcleos urbanos do concello. Nesta ocasión, con motivo das festas da Madalena, estarán na praza Manuel Murguía o trío Tacón Gitano e Pitusa Semifusa. Animo a toda a cidadanía a que se achegue a velos e escoitalos. O acceso é libre e gratuíto”.

Programación do “AmesON de verán” en agosto e setembro
Durante este mes sucederanse outras dúas actuacións. Xa o martes 8, a veciñanza poderá achegarse ata a praza de Chavián, en Bertamiráns, para ver un espectáculo de Paco Nogueiras. E pechará agosto Los Mecánicos, no parque do Ameneiral, o día 12.

Para poñer fin ao programa, a orquestra Olympus estará no aparcadoiro do SuperCor, no Milladoiro, o domingo 3 de setembro. O concerto será aberto polos gañadores da terceira edición do karaoke “Canta con Ames”.