Os atletas Verónica Calvo e Daniel Paz proclamáronse esta fin de semana campións galegos en categoría absoluta de trail running, despois de gañar a proba desenvolvida nesta edición na Serra do Barbanza. No evento, que contou cun esixente circuíto de algo máis de 25 quilómetros, participaron arredor de 150 persoas, que gozaron dunha xornada de bo tempo e dun percorrido de gran beleza.

Cómpre destacar que o novo campión galego, o amesán Daniel Paz, vén de participar e de gañar na terceira edición do Trail e Andaina Ribeiras do Tambre, celebrado no concello de Ames no pasado mes de febreiro. Nesa proba, que partía de Ponte Maceira e que remataba nas instalacións do Real Aeroclub de Santiago, en Piñeiro, Paz parou o tempo en 1:09:01.

Aos dous gañadores acompañáronos no podio Carla Trillo, do Ría de Foz, e Carlos Lorenzo, do Jab-Berga na segunda posición. En terceiro posto remataron Eva de la Fuente, do Brión-Hyupersa Santiago, Roberto Tuñas, do C.A.Negreira. Deste xeito, estes seis corredores e corredoras lograban a súa selección de maneira automática para formar parte do combinado galego que participará no campionato de España por autonomías.

Ademais, paralelamente a este campionato autonómico disputouse o Trail Popular Serra do Barbanza, nas modalidades de longo e curto. Neste senso, no longo impuxéronse Rebeca Marino e Sebastián Reboreda, mentres que no curto o triunfo foi para Cristina Carril e Manuel Currás.