O centro de depósito de residuos do Punto Limpo de Ames, situado no polígono do Milladoiro, rexistrou 588 entradas durante o pasado mes de febreiro. Trátase dun incremento de máis de 100 entradas con respecto ao mes de febreiro do ano anterior, que poñen de manifesto a capacidade de sensibilización de campañas que se foron realizando  para concienciar á veciñanza.

Algúns exemplos destas campañas foron “Non nos merecemos isto” ou “Ames recicla o Nadal. Fagamos da festa unha escola de familia”, ás que se suman as realizadas no anterior mandato como “Cada cousa no seu sitio!” ou “ASÍ NON. Lévaos ao Punto Limpo #CoidaAmes”.

A campaña “Ames recicla o Nadal. Fagamos da festa unha escola de familia” foi un manual de bos usos no que se recollen diferentes pautas de como reducir, reutilizar e reciclar en Ames. Foron repartidos 3.000 libros entre o alumnado dos colexios de infantil e primaria e nos comercios e locais de hostalería.

Ademais, recentemente realizouse a campaña “Non nos merecemos isto”, a través da cal se editaron 3.000 calendarios da mesa e 500 calendarios grandes de parede co lema de dita campaña e fotos de lixo e voluminosos depositados en fincas, camiños, montes e zonas de aparcamento. Ditos calendarios tamén conteñen información do Punto Limpo, que está situado na rúa das Hedras do parque empresarial Novo Milladoiro. Ata alí poden achegarse todos os veciños e veciñas de Ames para desfacerse de aqueles obxectos e materiais que non van aos colectores convencionais de materiais orgánicos, inorgánicos, vidro ou papel.

O concelleiro de Servizos Básicos, Blas García, destacou “a incidencia positiva que están tendo as campañas de sensibilización levadas a cabo nos últimos meses que están permitindo que a veciñanza faga un maior uso dos medios existentes en materia de reciclaxe. Isto permite mellorar a convivencia entre a cidadanía, xa que é un problema que afecta por igual á zona rural como ás localidades urbanas.  Aínda así é necesario seguir incidindo neste tipo de campañas para concienciar á veciñanza sobre o deposito incontrolado de voluminosos”.

Punto Limpo móbil
O pasado sábado, 29 de febreiro, contouse coa presenza, na praza do Concello de Bertamiráns, dun Punto Limpo móbil. Trátase dun vehículo adaptado que se emprega para recoller e facilitar a xestión dos diferentes residuos e a reciclaxe mediante a recollida selectiva. Foron moitos os veciños que pasaron a coñecer e interesarse polo seu funcionamento, xa que era a primeira vez que se achegaba a Ames. O obxectivo era facer unha xornada de divulgación e sensibilización, facilitando aos veciños e veciñas a reciclaxe mediante unha recollida selectiva.

Entre os residuos que foron levados a este punto limpo destacaron as pinturas e vernices,baterías, pequenos aparatos eléctricos e electrodomésticos, CDs e DVDs, luminarias e aveños varios.    

588 entradas no Punto Limpo do Milladoiro durante o mes de febreiro
Durante o pasado mes de febreiro a veciñanza amesá achegou 3437 quilogramos de equipos eléctricos e electrónicos, 100 quilogramos de envases baleiros contaminados, 100 quilogramos de pneumáticos fóra de uso (18 unidades), 70 quilogramos de baterías de chumbo (4 unidades), 6 metros cúbicos de roupa, 70 metros cúbicos de voluminosos e
7 quilogramos de pilas (arredor de 230 unidades).

Ademais rexistrouse a entrada de 66 unidades de tubos fluorescentes e outras lámpadas, e de varios residuos, entre os que se encontran 20 metros cúbicos de escombro, 20 metros cúbicos de plásticos, 20 metros cúbicos de metais, 54 quilogramos de pintura e 70 metros cadrados de madeira. Cómpre engadir tamén os aceites, 108 litros de aceite vexetal e 72 litros de aceite de motor.

Horarios e teléfono de contacto do Punto Limpo
O Punto Limpo está situado na rúa das Hedras do polígono Novo Milladoiro e ata alí poden achegarse todos os veciños e veciñas de Ames para desfacerse de aqueles obxectos e materiais que non van aos colectores convencionais de materiais orgánicos, inorgánicos, vidro ou papel.

Este centro está aberto preto de 40 horas semanais en xornada de mañá e tarde entre luns e o sábado. Así, o Punto Limpo abre de luns a venres de 10:00 h a 14:00 horas e de 16:00 h a 18:00 horas. Os sábados o horario é de 9:00 h a 14:00 horas e de 16:00 h a 20:00 horas. As persoas que teñan calquera dúbida poden chamar ao teléfono 981 53 66 88.

Os voluminosos deben depositarse no Punto Limpo. Outra opción é chamar aos números de teléfono 981 19 12 40 ou 639 10 76 38, para acordar unha data e un lugar, coa finalidade de depositar o voluminoso xunto ao contedor máis próximo, para que posteriormente se realice a recollida de ditos aveños e voluminosos.