A comunidade educativa do CEIP de Barouta organiza este vindeiro xoves 30 de decembro, a partir das 12.00 horas, a IX edición da súa tradicional carreira solidaria “Móvome pola paz”, en conmemoración do Día Internacional da Paz. O propósito principal desta iniciativa solidaria é recadar alimentos e outros produtos de primeira necesidade para o Banco de Alimentos municipal. Ademais, este ano volverán a recadarse fondos para a situación de emerxencia en Gaza (Palestina) para enviar a través da Axencia das Nacións Unidas (UNRWA).

Na carreira poderá participar tanto o propio alumnado da escola, como pais e nais dos estudantes ou parte da veciñanza que desexe participar. Así mesmo, tamén participará a rapazada de sexto de Primaria dos CEIP da Maía e do Agro do Muíño, así como o alumnado das escolas unitarias. Deste xeito, explicou o propio director do CEIP de Barouta, Alonso Caxade, que “se busca facer unión entre os rapaces e rapazas xa que se encontrarán o ano que vén no instituto”.

Diversos percorridos
Esta proba non ten carácter competitivo, polo que o obxectivo principal é pasalo ben todos os participantes durante a proba. Todos os corredores sairán desde o mesmo punto de partida e, en función da idade, haberá un percorrido diferente. Para os máis pequenos, establécense diferentes distancias dentro do propio centro escolar e, a partir de 3º de primaria, a carreira realizarase fóra do recinto.

Pola súa banda, Alonso Caxade agradeceu “a colaboración do equipo de Protección Civil de Ames e á Policía Local para a realización da proba fóra do recinto para garantir a seguridade de todos os participantes”. Na mesma liña, agradeceu a colaboración de todos os patrocinadores que fan posible a proba; o Concello de Ames, Galitiming, CLUN-Feiraco, Gadis, Tomate Más Fruta, Grafinor, Addomo, Cabañitas do Bosque, Bandini, Leria, Carlín Bertamiráns, Hospital Veterinario A Media Lúa, Vagalume Pellet, Froiz, Agacal+Craega, Ézaro Ediciones, Addomo e Biosbardos.

Todos os corredores recibirán unha pequena bolsa de agasallo ao rematar a proba, que incluirá unha peza de froita, auga, un iogur bebible e algún detalle a maiores.

Recollida de alimentos
Con esta iniciativa que, ademais de ter un fin solidario, foméntase a práctica do exercicio físico e uns hábitos de vida saudables, tamén se busca poñer o foco nos dereitos da infancia, “é importante resaltar a importancia nos nenos e nenas en emerxencia social e tamén pensar na súa perspectiva cando facemos unha doazón a un banco de alimentos, que lle gustaría recibir a un menor nesa situación, sen esquecer outros produtos básicos”, resaltou o director do centro.

Por outro lado, aínda que non se participe na carreira solidaria, é posible participar na recollida de alimentos que leva a cabo o centro escolar. Deste xeito, todas as persoas que queiran colaborar, poden depositar os produtos no CEIP de Barouta en horario de 8.30 a 15.00 horas a partir deste luns.

Este ano volverá a amadriñar a iniciativa unha persoa relacionada co mundo da cooperación. Na mesma liña, continuarase coa venda de rifas para a recadación de fondos para Palestina e, desta volta, sortearanse 4 lotes de libros. . Na pasada edición, a recadación total foi preto de 3.000 euros e de 500 quilos de alimentos.