O CEIP de Barouta promove, dentro do marco do programa Lectura e familias, unha Festa da Primavera, que terá lugar este sábado na praia fluvial de Tapia. O evento comezará ás 17:00 horas, cunha mesa redonda que leva por título “Ler, escribir e falar”. Nela intervirán Eva García Sexto, docente de Educación Infantil; Bea Campos, animadora; e María López Sández, escritora, profesora, experta rosaliana e membro de número da Real Academia Galega (RAG).

Á mesma hora estaranse desenvolvendo paralelamente diversos xogos populares para os cativos e cativas, que correrán a cargo da empresa Biosbardos, que se encarga da xestión de actividades de ocio, educativas e culturais.

A continuación, arredor das 18:00 horas, terá lugar un contacontos, que correrá a cargo de María da Pontragha, Vero Rilo e Bea Campos. Estará organizado polo colectivo de Narración Oral Galega (NOGA).

Ao remate, ás 19:00 horas, Brais das Hortas ofrecerá un concerto. Das Hortas é músico dende 1996, e na actualidade forma parte dos grupos Sacha na Horta e Blues do País. Toca a guitarra eléctrica, clásica, acústica e portuguesa, laúde árabe, frauta chinesa, caixón, batería de refugallo, darbouka, karkaba, kalimba, beatbox, harmónica, antenas tubulares, melódica, efectos sonoros… Ademais, é clown e compón e grava bandas sonoras orixinais para diversos espectáculos. 

Para pechar a xornada, o alumnado de 6º de Primaria do centro escolar organizará unha tómbola para todos os asistentes.

Programa Lectura e familias
Lectura e familias busca promover a lectura e o uso responsable da información entre os distintos sectores da comunidade escolar. É unha das fontes de financiamento da Festa da Primavera.

Novas relacionadas:

AMS GO!: "Festa da Primavera o sábado 27 no CEIP Barouta"