A asociación de venezolanos en Santiago (AVESANTI) é unha entidade socio-cultural cuxo obxectivo xeral é orientar, asistir e servir de punto de encontro do colectivo venezolano localizado en Santiago de Compostela e comarca, facilitando o seu desenvolvemento e integración á sociedade e cultura galega. Dende esta asociación trátase de achegar orientación primaria en temas de documentación, vivenda, educación, sanidade, laboral, etc... Ademais, desenvolve actividades que evoquen e manteñan os costumes, historia e cultura venezolana, así como tratan de facilitar a integración de persoas con maior risco de exclusión social dentro do colectivo venezolano.

Deste xeito, o Concello de Ames colabora con esta entidade na realización do taller “Coñece os teus dereitos laborais”. Esta actividade impartirase este venres, 14 de xuño, de 11.00 a 13.00 horas, no  centro cultural do Ensanche, situado na rúa Frei Rosendo Salvado, número 14- 16, en Santiago de Compostela. Os poñentes serán os técnicos do Concello de Ames: Jorge Couñago, axente de emprego local, e Leonardo Pena, mediador social intercultural.

Asesorarase aos participantes sobre a busca de traballo e os dereitos laborais dos/as traballadores/as. Tamén se lles dará información sobre a que institución hai que chamar en caso de despido inxustificado; a porcentaxe de desconto da seguridade social; que cousas é necesario saber no momento de asinar un contrato; e dos dereitos dos empregados en xeral.