O lema da campaña deste ano é #QueADiabetesNonTePare, que concerne os retos para este 2019: camiñar e moverse pola diabetes. Desta maneira, este lema  estará presente na lona que se colocará para o día de mañá na fachada da casa do concello. Ademais, durante esta noite será iluminada a fachada na cor oficial da campaña, a azul, e realizarase a difusión dos vídeos oficias a través da páxina web do Concello.

A concelleira de Benestar Social, Luísa Feijoo, recalca “a importancia do papel da familia para que as persoas con diabetes poidan recibir un diagnóstico temperá e lles axuden a controlala para que poidan ter unha vida perfectamente normal, cunha boa calidade de vida”. Ademais engade que “a familia é un axente crave a hora de modificar hábitos, en prol dunha vida máis saudable”.

Día Mundial da Diabetes
O Día Mundial da Diabetes vense celebrando desde 1991, cando a Federación Internacional de Diabetes e a Organización Mundial da Saúde escolleron o 14 de novembro para lembrar o aniversario de Frederick Banting, quen, xunto con Charles Best, tivo a idea que lles conduciría ao descubrimento da insulina, en outubro de 1921. En decembro de 2006 a ONU aprobou unha resolución que incluía esta data no seu calendario de días oficiais da saúde, sumándose así á súa celebración a partir de 2007.

A diabetes é aquela situación na que os niveis de azucre (ou glicosa) no sangue están aumentados. É unha das principais causa de cegueira, amputación, enfermidade do corazón, insuficiencia renal e morte prematura.