Adelina Pinto, presidenta do grupo temático de Educación e Cultura, Xoán Vázquez Mao, secretario xeral do Eixo Atlántico, e Claudio Garrido, alcalde de Sarria, recibiron aos asistentes. A xornada finalizou coa visita guiada ao Mosteiro da Madalena, en Sarria, e ao Mosteiro de Samos, situado no Camiño de Santiago.

Adelina Pinto inaugurou a xornada destacando a importancia de “compartir as experiencias, as cousas boas e as non tan boas”. Ademais, asegurou que o Eixo Atlántico “ten a capacidade de unirnos ao redor da educación”. Pola súa banda, o alcalde de Sarria, Claudio Garrido, defendeu a educación pública, mentres que o secretario xeral do Eixo Atlántico criticou o ascenso dos populismos e asegurou que “deixa entrever o fracaso do modelo educativo. O modelo non fomenta a capacidade crítica”.

Saúde mental
Na temática de saúde mental, tres entidades presentaron as súas boas prácticas coa moderación de Ana González Abelleira, deputada da área de Formación, Ensino, e Economía do Coñecemento da Deputación de Lugo.

Luísa Feijóo, concelleira de Benestar Social e de Promoción da Saúde do Concello de Ames, expuxo o seu programa “Regulación Emocional”. Tras observar as consecuencias que a pandemia provocou nos mozos e mozas de secundaria, o Concello de Ames organizou catro sesións de mindfulness dirixidas ao alumnado, familias e profesorado co obxectivo de desenvolver unha maior competencia emocional; aprender a percibir, expresar e controlar as emocións; concibir que o sentimento, o pensamento e a acción están ligados; aprender a acougar a mente, conseguir un estado de serenidade e tranquilidade; desenvolver a habilidade para xerar emocións positivas; reducir o estrés, a ansiedade e os síntomas de depresión; reducir a reactividade e os problemas de conduta; aumentar a capacidade de concentración e reducir a tendencia para distraerse.

Ademais, Luísa Feijóo explicou que “con este programa conseguimos que os nosos mozos e mozas coñeceran as súas propias emocións; manexaran ditas emocións; tiveran un coñecemento básico sobre como funciona a mente e como é afectada polos propios pensamentos e emocións; e traballaran coa atención plena para implementar recursos persoais para a regulación emocional. As intervencións baseadas en atención plena ou mindfulness poden mellorar a saúde física e mental e o benestar emocional dos nenos e adolescentes que participan nelas. Outro dos grandes obxectivos deste programa é dar a coñecer a saúde mental e desmitificala”.

Olegario Sampedro, presidente do Instituto de Mediación Educativa de Ribeira, falou sobre a entidade. O IMER é unha asociación socio-educativa sen ánimo de lucro formada, en 2011, polo profesorado de secundaria. Os seus obxectivos son fomentar a mediación e o coñecemento como instrumento adecuado na xestión e resolución de conflitos no ámbito educativo e propiciar a Cultura de Paz e os Dereitos Humanos como marco adecuado de convivencia.

Marlene Sousa, do ProChild CoLAB de Guimarães, presentou "Coaction e a saúde mental das crianças”, un proxecto comunitario de investigación-acción, co obxectivo de promover o benestar, a saúde mental e a resiliencia dos nenos, entre 3 e 10 anos, durante e despois da pandemia da Covid-19, a través dunha acción colaborativa entre o ProChild CoLAB, o Concello de Guimarães, o CIPsi e a APsi- UMinho.

A través deste proxecto, ponse a disposición un rastrexo en liña de problemas de saúde mental a preto de 6.000 nenos entre 3 a 10 anos de idade da rede escolar pública do municipio de Guimarães, sendo ofrecida avaliación psicolóxica profundada e intervención psicolóxica empiricamente fundamentada, individualizada e gratuíta ás que presenten problemas de saúde mental e ás respectivas familias.

Educación patrimonial e cidadanía
En materia de educación patrimonial e cidadanía, moderou o faladoiro Rubén Prol, concelleiro de Educación de Santiago de Compostela.

Beatriz Varela, técnica de Educación de Santiago de Compostela, presentou “Vivir nas cidades históricas”, un relatorio no que se recalcou a importancia de que os colexios colaboren con outras entidades da cidade para que os nenos e nenas aprendan sobre patrimonio histórico, cultural e natural. O Concello de Santiago, a través de distintos departamentos municipais, da rede de museos, así como dun bo número de entidades e empresas, conta con diferentes recursos didácticos que converten a cidade nunha aula.

Algúns destes programas son “Vivir en Santiago”, co que se poñen ao dispor dos colexios os recursos da cidade; “Aula de Patrimonio”, para coñecer as cidades; “Patrimonio da Humanidade en España”; ou “Coñecer as cidades do Eixo Atlántico”, que organiza intercambios escolares.

Isabel Teixeira, técnica superior de Educación de Vila Real, pechou a temática de educación patrimonial e cidadanía coa iniciativa “Assembleia Municipal Infantil”. O seu obxectivo é incentivar o interese, desde os primeiros anos, polos deberes e dereitos como cidadán, así como desenvolver capacidades de intervención e argumentación.

Promoción das competencias socio-emocionais
Por último, falouse sobre a promoción das competencias socio-emocionais. Esta parte do seminario foi moderada por Adelina Pinto, Vereadora de Educación de Guimarães.

Mara Alves, técnica do municipio de Santa Maria da Feira expuxo o proxecto "O crescer do ler e ser". O traballo foi creado durante o curso 2016-2017 coa intención de que colexios e familias cren oportunidades que promovan o desenvolvemento cognitivo dos nenos, pero que garantan tamén a súa formación interpersoal. Deste xeito, a intención é alcanzar obxectivos académicos, sociais e emocionais nas diferentes fases do ciclo vital a través de prácticas como a alfabetización emerxente e as cualificacións socio-emocionais na educación pre-escolar.

Lúcia Ramalho, psicóloga no departamento de Educación de Valongo, e Andreia Espain, presidenta da asociación Mente de Principiante, presentaron "Calmamente - aprendendo a aprender-se", un proxecto que culminará co lanzamento dun Ebook (editado pola Happy Zone Edicións), onde son compartidos varios testemuños de nenos de 8 e os 11 anos sobre as emocións e mailos sentimentos.

Por último, Iria Rajal, profesora de música en dous centros de ensino especial no Concello de Coruña, falou da iniciativa de "Musicoterapia e Pedagoxía Musical para escolas con necesidades especiais". A experta explicou que a musicoterapia é unha profesión de ámbito socio-sanitario na que se utiliza a música e os seus elementos, (o son, o ritmo, a melodía e a harmonía). O obxectivo é sempre terapéutico. Normalmente, o seu traballo vai dirixido a nenos e adolescentes con casos de TEA (autismo), Down, Asperxer, X-Fráxil, hiperactividade, parálise cerebral, cegueiras...

Novas relacionadas:

El Correo Gallego: "El Eixo Atlántico aprende mindfulness contra el efecto emocional de la covid"