O dinamismo urbanístico e empresarial do parque empresarial do Novo Milladoiro está en auxe. Proba disto é a posta en funcionamento do novo hotel B&B que está situado na esquina da rúa das Palmeiras coa rúa do Buxo e conta con 82 habitacións (dobres matrimoniais, dobres plus e dobres con dúas camas), todas climatizadas. Ademais este hotel caracterízase por ter un deseño moderno e á vez cálido para sentirse como na casa.

O director do establecemento, José Manuel Docampo, foi quen recibiu á delegación do Concello e lles amosou o hotel e a oferta de servizos que presta na actualidade. Docampo resaltou a importancia da localización, que permite crear sinerxías co resto de empresas do parque empresarial e captar aos clientes corporativos propios dun polígono con tanto dinamismo como o é o do Milladoiro. Por outra banda, tamén explicou que un gran nicho de negocio son o peregrinos que veñen de facer o Camiño Portugués, que atopan no B&B unha opción con boas prestacións e a un prezo razoable para o último descanso antes de chegar a Compostela.

O alcalde de Ames, Blas García, destacou a proposta turística sostible de Ames que “ofrece varias rutas de sendeirismo, vinculadas ao río Sar e ao Tambre, para que os visitantes aposten por un ecoturismo saudable”, xunto coas relacionadas co Camiño de Santiago. “Somos o único Concello de Galicia e de España, quitando Compostela loxicamente, por onde que pasan tres rutas do Camiño”.  Ademais, o rexedor municipal explica que “a dinamización económica e o desenvolvemento de actividades produtivas que impulsen a economía local son unha prioridade para este equipo de goberno”. Neste senso, asegurou que "a posta en funcionamento do B&B Hotel Milladoiro é unha boa nova para o Concello de Ames xa que amplía o servizo de aloxamento no noso municipio e ao mesmo tempo supón un importante impulso económico para Ames”.

A licenza urbanística para a construción do que é o hotel con maior capacidade de Ames foi concedida no ano 2022. Tras meses de obras, o B&B Hotel Milladoiro comezou a funcionar no ano 2024. Este hotel atópase preto do Albergue Milladoiro, ampliando o servizo de aloxamento no principal núcleo do concello de Ames. Tanto o B&B Hotel coma o Albergue Milladoiro atópanse a poucos metros do Camiño Portugués que pasa pola localidade do Milladoiro.

Esta visita enmárcase dentro da rolda de visitas que está realizando o goberno municipal para coñecer máis de preto o tecido empresarial e económico do concello. O novo B&B Hotel Milladoiro supón un novo servizo para ampliar e fomentar o turismo en Ames.

Novas relacionadas:

El Correo Gallego: "O B&B Hotel Milladoiro redimensiona a oferta ao paso de tres rutas xacobeas"