Ante a situación de emerxencia nacional e unha vez decretado o Estado de Alarma en España pola crise sanitaria polo coronavirus, celebrouse este mércores, baixo a presidencia do alcalde de Ames, Jose Miñones, e coa asistencia do concelleiro de Seguridade Cidadá, Víctor Fernández, do Comandante do posto da Garda Civil do Milladoiro e o Inspector Xefe da Policía Local, unha reunión de coordinación co obxectivo de garantir o cumprimento das medidas tomadas polo Goberno do Estado para atallar a crise sanitaria polo coronavirus.

 

Tanto a Garda Civil como a Policía Local teñen activados os seus respectivos dispositivos para a xestión desta crise que mobilizará a todos os seus efectivos co fin de garantir que se cumpran as medidas establecidas no Real Decreto 463/2020 que desenvolve o Estado de Alarma para loitar contra o COVID-19 (coronavirus).

 

Por outra banda, ambos corpos de seguridade coordinarán todas as súas actuacións para facer fronte á pandemia e manterán un contacto diario. Tamén intercambiarán información todos os días para optimizar recursos e atender ás situacións que vaian xurdindo. Ademais, falouse sobre as medidas adoptadas polo propio Concello de Ames na xestión da crise derivada do Covid-19.

 

Na reunión destacouse tanto por parte da Garda Civil como da Policía Local que a cidadanía de Ames está a manter en xeral unha actitude responsable e acorde á situación, salvo en casos e circunstancias moi puntuais.

 

Nesta reunión insistiuse na imprescindible colaboración cidadá para gardar o confinamento, así como no cumprimento das normas sobre a restrición á mobilidade, aspecto fundamental sen o cal será máis difícil e custosa a solución desta grave situación á que todos nos enfrontamos.