O alcalde de Ames, Blas García, a concelleira de Mobilidade, Beatriz Martínez, e mailo concelleiro do Rural, Santiago Márquez, participaron este mércores, 27 de abril, nunha xuntanza coas asociacións veciñais de Tapia, Piñeiro, Covas, As Tres Aldeas (Vilar, Pedrouzos e Lamas) e Ames (Pedra do Fuso), para abordar as incidencias detectadas no servizo de transporte metropolitano e tratar de buscar solucións neste eido coa Dirección Xeral de Mobilidade, da Xunta de Galicia, que é o organismo competente nesta materia.

Dende as asociacións trasladaron o seu malestar pola desaparición da frecuencia de autobús das 13:15 horas da liña Portomouro-Santiago, xa que esta é a frecuencia máis empregada pola veciñanza destas parroquias. Os representantes das asociacións tamén dixeron que ultimamente a máquina de cobro de billetes non funciona segundo lles informan os condutores dos autobuses e non aceptan o pago en efectivo. Deste xeito, non queda constancia do número de usuarios/as que utiliza o servizo o que pode provocar que a empresa concesionaria quite algunha frecuencia máis alegando falta de viaxeiros/as.

Por último, dixeron que nos horarios desta liña están a sufrir alteracións excesivas o que fai que a veciñanza non chegue a tempo aos seus traballos, centros de estudios, visitas médicas, etc.

Dende o Goberno municipal apoian a toda a veciñanza afectada xa que dende a entrada en funcionamento, o pasado 23 de decembro de 2020, da nova concesión, o servizo do transporte metropolitano é cada vez máis precario, indo en contra do modelo actual de mobilidade que pretende promocionar o uso do transporte público, pero para iso precísase dun servizo de calidade.

O alcalde de Ames, Blas García, destaca que “de novo dende o Concello de Ames temos que poñernos en contacto coa Dirección Xeral de Mobilidade, para dar a coñecer cal é a situación na que se encontra a veciñanza amesá no eido do servizo de transporte metropolitano, que discorre polo noso municipio, e que se está a prestar neste momento. Vamos a desenvolver varias accións conxuntas e de forza para conseguir recuperar as frecuencias, e que os veciños e veciñas poidan ter un servizo normal".

Blas García engade “debemos trasladar o noso malestar polos trastornos que están a ocasionar estas anomalías na veciñanza de Piñeiro, Ames, Covas e Tapia; e quero declarar con rotundidade que este Goberno defenderá e apoiará a toda a veciñanza nas súas reclamacións sobre o funcionamento do transporte metropolitano, e máis tratándose do rural, xa que é imprescindible que este servizo funcione ben e atenda as necesidades porque é clave para fixar a poboación”.

Novas relacionadas:

La Voz de Galicia: "Surgen más quejas por recortes del transporte en el rural de Ames"

El Correo Gallego: "Voa a frecuencia das 13.15 no autobús de Portomouro"

Enfoques: "El gobierno de Ames aborda las incidencias del transporte metropolitano con asociaciones vecinales"