En “Non podo máis!”, o grupo porá sobre o escenario situacións recoñecibles, do día a día, onde a paciencia dos protagonistas será posta a proba. Como reaccionas cando alguén se cola diante de ti no supermercado? Ou que fas cando a túa filla adolescente se rebela e quere saír de botellón? Que camiño tomas cando vas a ese restaurante tan caro que che recomendaron e só che serve un prato baleiro chamado aroma de cocido?

A obra é unha escolma de escenas seleccionadas e creadas baixo esta premisa para conseguir así a complicidade e o sorriso dun público que ben se podería sentir identificado en moitas delas.

O elenco está conformado por Carmela Pardal, Chelo Cajide, Cris Botrán, Emilia Mayo, Gene Martínez, Ilduara García, Maite Fajardo, Mirela González, Mirella Vázquez e Pablo Núñez.

A primeira representación terá lugar o xoves 8 de xuño, ás 20:30 horas, na Casa da Cultura do Milladoiro. Haberá un segundo pase na Casa da Cultura de Bertamiráns, o domingo 18 de xuño, ás 18.00 horas. As persoas interesadas en asistir xa poden retirar o seu convite, que é de balde, a través da Billeteira electrónica do Concello de Ames.

Novas relacionadas:

AMS GO!: "'Non podo máis': teatro cómico sobre as coitas do día a día na Casa da Cultura do Milladoiro"

Lindeiros: "'Non podo máis!', nova estrea do Grupo Municipal de teatro de Ames"