O alcalde de Ames e concelleiro de Cultura, Blas García, anima a todo o mundo a desfrutar destas proxeccións e reitera o compromiso do Concello de Ames co sétimo arte e co sector audiovisual: “O Concello de Ames está comprometido coa promoción da cultura e máis en concreto co sector audiovisual, sector que potencia a través de distintas vías”. O Concello de Ames fai promoción do cine a través de programas como o Cinema Miúdo e potencia o sector audiovisual mediante aceleradoras como o Ames Audio Visual Lab.

A Concellaría de Cultura volve a programar un novo ciclo de cine, desta volta durante o outono. Ese novo programa cultural súmase a outros programados anteriormente como “Abril de cine” ou o ciclo “Mestre Mateo”. Neste caso proxectaranse dúas longametraxes os martes 7 e 14 de novembro, ás 20.00 horas, no auditorio da Casa da Cultura do Milladoiro. Cómpre destacar que son dous filmes de produción galega, dirixidos por directoras galegas e con actores e actrices de Galicia.

Este ciclo de cine está espertando o interese da veciñanza amesá, xa que para ver O Corno xa non quedan entradas. Para a proxección do filme Salta aínda quedan bastante entradas, polo que as persoas que estean interesadas en acudir poden adquirir a súa entrada a través da Billeteira electrónica. Ao final de ambas as dúas proxeccións farase un coloquio no que participarán as directoras dos dous filmes: Jaione Camborda e Olga Osorio.

O martes 7 de novembro, ás 20.00 horas, proxectarase o filme O Corno, dirixida por Jaione Camborda, e que gañou a Concha de ouro á mellor película no Festival de cine de San Sebastián 2023. Esta longametraxe está ambientada na Illa de Arousa de 1971. María é mariscadora pero tamén é coñecida na illa por axudar a outras mulleres nos partos con especial dedicación e coidado. Despois dun inesperado suceso, María vese obrigada a fuxir e comeza unha perigosa travesía que lle fará loitar pola súa supervivencia. Na procura da súa liberdade, María decide cruzar a fronteira por unha das rutas de contrabando entre Galicia e Portugal.

Por outra banda, o martes 14 de novembro, tamén ás 20.00 horas, proxectarase o filme Salta, de Olga Osorio. Trátase dunha longametraxe que adapta a curta Einstein-Rosen, realizada previamente pola propia directora. Óscar e Teo (13 e 10 anos) son dous irmáns, moi diferentes entre si, que viven nun modesto piso de barrio. É o verán de 1989. Teo é un afeccionado ao fútbol e un pouco traveso, Óscar é un sabeo-todo, que prefire pasar as tardes de verán estudando a teoría da relatividade. En realidade, cada un trata ao seu xeito a desaparición da súa nai, unha prometedora científica obsesionada cos buratos de verme.

Novas relacionadas:

La Voz de Galicia: "Jaione Camborda presenta «O corno» en Ames"

Enfoques: "O Corno y Salta llegan a Ames en un nuevo ciclo de cine"