Onte xoves, 18 de maio, o Monbus Obradoiro cambiou o seu lugar habitual de traballo e trasladouse ao pavillón polideportivo do Milladoiro, sede do equipo filial do club que milita en Liga EBA: o Obradoiro Ames.

Así, o equipo ofreceu unha parte da xornada de adestramento aberta ao público á que acudiron xogadores do AD Básquet Ames, así como todos aqueles veciños do concello de Ames que non se quixeron perder vivir esta experiencia no pavillón municipal.

En canto finalizou a sesión de traballo, todos os asistentes puideron baixar á pista para facerse unha fotografía de familia cos xogadores e co equipo técnico do conxunto obradoirista para inmortalizar este momento. Tampouco faltaron os momentos de charla, de conseguir as firmas dos seus xogadores favoritos e facerse fotos con cada un deles.

O Concello de Ames terá representación no partido do próximo martes, 23 de maio, ás 20.30 horas, no Multiusos Fontes do Sar, onde estarán para apoiar ao equipo na última xornada da liga Endesa ante o Carplus Fuenlabrada.

A realización de dito adestramento no Milladoiro enmárcase dentro do acordo subscrito no pasado mes de agosto entre o Concello de Ames, o Monbus Obradoiro e maila Fundación Obradoiro, para que o equipo filial, que compite na liga EBA, se denomine Obradoiro Ames e dispute os seus encontros como local no pavillón municipal do Milladoiro.

A concelleira de Deportes, Susana Señorís, destaca “a importancia de que se celebren actividades deste tipo no noso concello porque permite crear afección polo deporte e neste caso polo baloncesto. Sempre é un pracer e que os veciños e veciñas poidan acudir a un adestramento dun equipo profesional como é o Monbus Obradoiro e que poidan falar e facer fotos cos seus xogadores favoritos”.