- Tematica
Youtubeiras, proxecto organizado polos servizos de normalización lingüística de doce concellos (entre os que se atopa Ames), das tres universidades galegas e da Deputación da Coruña co obxectivo de fomentar a creación en galego no Youtube con temáticas e formatos diversos, así como de promover e visibilizar os diferentes perfís de persoas xeradoras de contidos na Rede, celebrará este sábado, ás 20.00 horas, no Pazo da Cultura de Carballo a gala de entrega dos Premios Youtubeiras 2022. Un total de 22 propostas finalistas aspiran a gañar este concurso nalgunha das súas oito categorías: canle, youtubeira/o, youtubeira/o revelación, vídeo, calidade lingüística, pioneiro, rede e o premio do público. O certame repartirá 7.500 euros en premios entre as persoas gañadoras, que tamén recibirán un diploma acreditativo e unha medalla simbólica deseñada para a ocasión por Nahuel Pérez.
“Para Carballo é unha gran satisfacción celebrar esta gala, xa que os Premios Youtubeiras son unha iniciativa que fomenta o uso da nosa lingua nunha xanela fundamental para comunicarnos, para mirarnos e para mirar o futuro: a creación de contidos na Rede”, sinalou Marcos Trigo, concelleiro de Cultura e Deportes de Carballo, nunha rolda de prensa celebrada esta mañá na que tamén participaron Carme Pereiro, coordinadora do Proxecto Youtubeiras; Cristina Collazo, guionista e presentadora da gala, e Mario Brión (Olaxonmario), gañador do Premio Youtubeira/o en 2021 e membro do xurado.
Trigo tamén puxo en valor “a colaboración institucional entre diversas administracións” na creación, organización e desenvolvemento do proxecto Youtubeiras. Ademais, lembrou unha serie de cifras que retratan esta iniciativa dende a súa posta en marcha. Neste senso, destacou que os vídeos participantes na primeira edición celebrada en 2017 foron 202, mentres que a cifra subiu até superar os 500 en 2020. Nas dúas últimas edicións, as bases do certame prestaron unha maior atención ás canles, de xeito que en 2021 concorreron 38 canles e no 2022, foron 75.
“Fantástica festa”
Carme Pereiro, como coordinadora do proxecto, completou as cifras achegadas polo concelleiro carballés. Á espera dunha análise polo miúdo das cifras de 2022, lembrou que na edición anterior as canles presentadas aglutinaban “2.600 vídeos, máis de 40.000 subscricións e máis de 2.743.000 visualizacións”. “Son números que dan boa conta do volume que acada a comunidade creadora de contidos da nosa lingua na Rede. Unha comunidade que nos enche de confianza no futuro e tamén de orgullo, de fachenda. E non só polas cifras, senón tamén pola calidade dos contidos e o variado das temáticas tratadas. Por iso, este ano os Premios Youtubeiras tiveron na frase Para Rede, a nosa o seu lema, un lema ben enérxico e ben decidido”, concluíu Pereiro antes de ceder a palabra a Cristina Collazo e lembrar que a música na gala correrá a cargo de LaMontagne e PicoAmperio.
A guionista e presentadora adiantou que o sábado o Pazo da Cultura acollerá unha “gala dinámica e interactiva” na que o público terá un “gran protagonismo”, na que se fomentará a “participación do patio de butacas” e que estará “chea de sorpresas”. “Teremos como presentadora a Rafaela de Carral, que conducirá a gala ao xeito dun concurso televisivo”, sinalou Collazo antes de rematar cunha promesa: a gala será “unha fantástica festa”. De feito, tras rematar a entrega, no Pazo da Cultura continuará a celebración con petiscos, posadoiro de vídeo 360º graos e música en galego a cargo de DJ Misa.
Finalmente, Mario Brión tomou a palabra para dar a perspectiva do xurado, que nesta edición estivo conformado tamén por Mónica Fernández Valencia, técnica de normalización lingüística do Concello de Ourense e coordinadora de Youtubeiras nas primeiras catro edicións; Carmen Nieto, dinamizadora e formadora no eido das novas tecnoloxías e promotora da canle Teño unha horta en San Sadurniño; Elvira Nercellas, estudante e integrante do Grupo por unha Medicina en Galego, e Alba Rodríguez, administrativa que deu a coñecer o seu cambio de lingua a través de Twitter no ano 2018.
Na súa intervención, Mario Brión destacou o amplo traballo que tivo que desenvolver o xurado este ano, a diversidade temática desta edición e o complexo que resultou acordar o palmarés que se desvelará este sábado durante a gala. Finalmente, rematou salientando o traballo das canles participantes, polo seu esforzo e por tecer comunidade na creación dixital en galego.
Representación amesá na Gala
Está previsto que por parte do Concello de Ames, un dos doce concellos que organiza Youtubeiras, asistan á gala de entrega de premios o concelleiro de Educación, David Santomil, e o persoal técnico do Servizo de Normalización Lingüística, Rosa Moreiras e Fátima Souto.
Por último, cómpre destacar que na relación de finalistas, na categoría de REDES, figura o Exército Mekemeke que participan no proxecto de Radio Cidadá de Ames Radio. Carlos Vieito, Lidia Veiga e Miguel Abab, que forman o Exercito Mekemeke, emiten un programa semanal en Ames Radio, os martes ás 19:30 horas.
A concelleira de Normalización Lingüística de Ames, Escarlata Pampín, explica que “para Ames é un orgullo seguir formando parte da comunidade Youtubeira que desenvolve este proxecto colaborativo tan necesario e apaixonante. É moi positiva a realización de proxectos como Youtubeiras, que xa vai pola sexta edición, porque fan medrar o uso da lingua galega na rede”. Ademais destaca que “este ano temos entre os candidatos aos premios ao Exército Mekemeke, que participan no programa de Radio Cidadá de Ames Radio, aos que lles desexamos moita sorte”.
Novas relacionadas:
La Voz de Galicia: "Youtubeiras expande rede dende Carballo"
El Correo Gallego: "Carballo xuntará o sábado aos mellores Youtubeir@s galegos do pasado ano"
