O salón de Plenos da Casa do Concello acollerá este venres, 11 de outubro, ás 10.00 horas, un pleno extraordinario no que a Corporación municipal debaterá sobre a aprobación da Conta Xeral 2023 do Concello de Ames. Tamén se vai dar conta das resolucións adoptadas contrarias aos reparos de 2023.

A Conta Xeral é un reflexo contable da xestión económica realizada durante un exercicio, que abarca aspectos económicos, financeiros, patrimoniais e orzamentarios. Esta formada por un conxunto de documentos e estados que o Concello ten que elaborar ao final de cada exercicio, ditos documentos informan sobre a situación do patrimonio (bens e dereitos do Concello, o seu financiamento, os seus préstamos e débedas ao final do ano); gastos, ingresos, beneficios e perdas da entidade local durante o ano 2023; e execución do orzamento (canto e en que se gastan os recursos obtidos nese ano e cales foron eses recursos). Tamén se informa sobre a forma na que se realizan estes gastos e ingresos.

A Conta Xeral está formada polo balance de situación, que reflexa a situación e a variación do patrimonio; a conta de resultados económico – patrimonial (ingresos e gastos económicos e o seu resultado); estado de fluxos de efectivo (reflexa en que medida os ingresos serviron para cubrir os gastos);  liquidación do orzamento (reflexa a execución do orzamento do Concello); e maila memoria, que completa e aclara a información que conteñen os distintos estados.

Dentro destes documentos hai varias magnitudes que é preciso analizar máis polo miúdo, o nivel de endebedamento, a execución do orzamento, o resultado orzamentario... entre outros, que achegan unha visión máis pormenorizada da xestión económica levada a cabo no exercicio 2023.