O Concello de Ames, a través da Concellaría de Obras e Servizos Básicos, está traballando dende hai tempo nos pregos do novo contrato do servizo de limpeza viaria e xestión dos Puntos Limpos do Concello de Ames. Deste xeito, vaise a debater no pleno ordinario do mes de marzo, que se vai celebrar este xoves, 25 de marzo, a aprobación do expediente de contratación. Dito contrato vai a ter unha duración de 10 anos. O importe base de licitación ascende a 1.064.223,85 euros, o que supón un incremento económico de 336.607,95 euros (46,26%), respecto do anterior contrato que ascendía a 727.615,90 euros.

Dito incremento é debido a que no novo contrato se inclúen moitas máis zonas para realizar a limpeza viaria, en concreto vaise prestar dito servizo en toda a localidade de Bertamiráns, do Milladoiro e das urbanizacións. Ata o de agora non se está prestado este servizo de forma habitual en todas as rúas urbanas. Ademais, co novo servizo tamén se vai a facer a limpeza nas distintas prazas do concello, que actualmente estaban fóra do contrato e que as limpaba o persoal da Brigada municipal de obras, e mailas áreas de aparcamentos dos núcleos urbanos.

Ademais, inclúense diversas zonas do rural, especialmente aquelas nas que hai beirarrúas, destacando a limpeza de A Ponte Maceira (principal núcleo turístico de Ames) ou os tramos do Camiño de Santiago. Tamén se vai ampliar o horario de atención do Punto Limpo, de luns a sábado, de 9.00 a 15.00 horas e de 16.00 a 20.00 horas. Outra das novidades será o servizo do Punto limpo móbil, xa que se vai a proporcionar á veciñanza un servizo de recollida selectiva de residuos domésticos especiais que deben ser obxecto de xestión diferenciada, para a súa reciclaxe, valorización ou eliminación controlada. Este servizo realizarase de maneira prioritaria nas zonas rurais do municipio.

Modificación do contrato do servizo de axuda no fogar
Por outra banda, o Pleno debaterá a aprobación do expediente de modificación do contrato do Servizo de Axuda no Fogar, na modalidade de SAF dependencia. A modificación será por importe de 336.845,69 euros para a ampliación de 850 horas mensuais. Cómpre lembrar que o Pleno aprobou o 25 de xuño de 2020 a adxudicación do contrato do Servizo de Axuda no Fogar, á contratista Servizos Sociais Ulla-SAR SL. O contrato asinouse o 22 de xullo de 2020 dando inicio a prestación do servizo o 1 de agosto de 2020. Os pregos de licitación do Servizo de Axuda no Fogar regulan a modificación do contrato, polo que se pode incrementar o servizo en 850 horas mensuais, tal e como se propón.

Ordenanza de terrazas
Ademais, debaterase a resolución de alegacións e maila aprobación definitiva da ordenanza reguladora da ocupación do dominio público e espazos privados de uso público por terrazas e elementos vinculados á actividade comercial e hostalería con fins non festivos. No pleno do 29 de decembro de 2020 aprobouse se xeito provisional dita ordenanza e someteuse a exposición pública por prazo de 30 días hábiles a efecto de exame e alegacións.

Durante o prazo de exposición pública, que comprendeu dende o día 11 de xaneiro ata o 19 de febreiro de 2021, ambos inclusive, foron presentadas 3 alegacións: unha polo grupo municipal do Partido Popular; a segunda por Jorge López Pena, en representación da Xuntanza de Empresarios de Ames; e a terceira por David Dopazo Mella como membro da Asociación Provincial de Empresarios de Hostalaría e Aloxamento de Santiago. Examinadas as alegacións polo servizo municipal de urbanismo propúxose a desestimación das alegacións de David Dopazo Mella e a estimación parcial da alegación do grupo municipal popular e de Jorge López Penas, en representación da xuntanza de empresarios de Ames.

Modificación do proxecto de pavimentación de accesos ao lugar de Ventosa
O proxecto de pavimentación de accesos no lugar de Ventosa está incluído no POS+ 2019, aprobado polo Pleno o 18 de decembro de 2018.  Unha vez remitido o expediente á Deputación Provincial da Coruña, o organismo provincial informou da necesidade de acreditar dende o punto de vista técnico que o proxecto cumpre os requirimentos do permiso de Patrimonio. Esta situación motivou a redacción dun proxecto modificado que dea cumprimento as esixencias da autorización da Dirección Xeral de Patrimonio. Dito proxecto, que non incrementa o orzamento (95.009,62 euros), terá que ser aprobado pola Corporación municipal.

Declaración institucional para o cumprimento do protocolo de vacinación
Ademais, tratarase a declaración institucional, ante a proposta do concelleiro do grupo mixto José Ramón Oulego, para garantir a máxima transparencia e cumprimento do protocolo de vacinación e asegurar o cese dos políticos que se salten ou cometan calquera tipo de irregularidade asociada ao proceso ou a orde de vacinación.

En dita proposta recollese que o Pleno de Ames manifesta a necesidade de que o equipo de Goberno, así como todas as formacións políticas con presencia institucional no consistorio de Ames asuman o compromiso ético de pedir a dimisión dos seus cargos públicos, que se salten o plan de vacinación ou que incumpran o protocolo de vacinación establecido en proveito propio ou beneficiándose da súa posición, prexudicando con iso ás persoas que realmente necesitaban con prioridade esa vacina e viron atrasada a súa quenda; así como o compromiso de cesar ao persoal contratado ou nomeado por eles que se salte o plan de vacinación ou incumpran o protocolo de vacinación.

Solicitude de comparecencia do alcalde
Tamén se abordará a solicitude de comparecencia do alcalde, presentada polo grupo municipal popular, para informar sobre o desenvolvemento do Plan Impulsa Ames e para que sexa efectiva na próxima sesión do Pleno da Corporación

Propostas presentadas polo grupo municipal socialista e Ciudadanos
Ademais, abordarase unha proposta do grupo municipal socialista sobre a demanda dun incremento das achegas da Xunta ao servizo de axuda no fogar. En dita proposta recollese que o Pleno do Concello de Ames, en base as competencias en servizos sociais que corresponden a administración autonómica, insta a Xunta de Galicia a que incremente o financiamento do Servizo de Axuda no Fogar que é da súa competencia e que xestionan os concellos, que permanece conxelado dende o ano 2012, de xeito que se axuste á realidade do prezo/hora actualmente vixente e se preste este servizo público esencial coa máxima calidade e coas mellores condicións de traballo para os/as profesionais deste servizo.

A segunda proposta, presentada polo concelleiro Jose Ramón Oulego, de Ciudadanos, trata sobre a condena dos altercados ocorridos en varias cidades españolas nas manifestacións en favor do rapeiro condenado Pablo Hansel, así como de apoio á labor levada a cabo polas Forzas e Corpos de Seguridade do Estado durante ditos altercados.

En dita proposta ínstase ao Goberno a levar a cabo unha investigación sobre a   organización de protestas violentas de forma coordinada en varias cidades españolas; reiterar o seu apoio ás familias, os empresarios, autónomos e donos de negocios afectados polos danos causados por estes violentos. Tamén se recolle o apoio a acción das Forzas e Corpos de Seguridade do Estado e mostrar o apoio aos axentes feridos; e desmarcarse expresamente das manifestacións públicas realizadas por Pablo Echenique, portavoz parlamentario de Unidas Podemos no Congreso, partido no Goberno de España, nas que mostraba o seu apoio expreso aos “mozos antifascistas” causantes dos disturbios e da violencia.

Novas relacionadas:

Lindeiros: "Ames debate sobre o Servizo de Axuda no Fogar"