O número de veciñas e veciños que fan uso do Punto Limpo para depositar os seus residuos segue a aumentar, xa que cada vez somos máis conscientes do importante que é reciclar correctamente aqueles refugallos que non se poden depositar nos colectores convencionais.

Deste xeito, o pasado mes de xaneiro rexistráronse un total de 457 entradas no servizo municipal a través das cales se achegaron diferentes residuos. Máis concretamente, a veciñanza amesá depositou 1.262 quilogramos de madeira, 1.357 quilogramos de lixo procedente da construción (formigón, ladrillos e outros), 1.082 quilogramos de metais, 119 unidades de tubos fluorescentes e outras lámpadas, 62 quilogramos de lodos de pintura, 186 unidades de voluminosos e 5 unidades de pneumáticos usados.

Ademais, rexistrouse a entrada de 5 quilogramos de envases compostos, 1 quilogramo de absorventes e trapos, 265 quilogramos de papel e cartón e 22 unidades de aerosois. Cómpre destacar tamén os aceites: 73 litros de aceite usado e 39 litros de aceite vexetal.

Tamén se achegaron 23 quilogramos de envases baleiros contaminados, 36 unidades de grandes aparatos electrodomésticos (GAES), 67 unidades de monitores e pantallas CRT-R5, 4 unidades de monitores e pantallas (non CRT nin LED), e 51 quilogramos de produtos fotoquímicos.

Horario e teléfono de contacto do Punto Limpo
O Punto Limpo está situado na rúa das Hedras do polígono Novo Milladoiro e ata alí pode achegarse toda a veciñanza de Ames para desfacerse de aqueles obxectos e materiais que non van aos colectores convencionais de materiais orgánicos, inorgánicos, vidro ou papel. Recentemente, ampliou o seu horario, e ofrece os seus servizos de luns a sábado en horario de mañá e de tarde. Así, o Punto Limpo abre de 9:00 a 15:00 horas e de 16:00 a 20:00 horas, seis días á semana. As persoas que teñan calquera dúbida poden chamar ao teléfono 981 53 66 88.

Os voluminosos deben entregarse no Punto Limpo. Outra opción é chamar aos números de teléfono 981 19 12 40 ou 639 10 76 38, e acordar unha data e un lugar para depositalos xunto ao contedor máis próximo e que, posteriormente, sexan recollidos.

Punto limpo móbil
Por outra banda, o ano pasado comezou a funcionar o Punto Limpo móbil. Trátase dun vehículo adaptado que percorre os diferentes lugares e parroquias de Ames, cuns horarios e puntos prefixados, normalmente ao carón das Casas da Cultura ou locais sociais de cada parroquia, co obxectivo de que a veciñanza do rural poida depositar os pequenos residuos domésticos para os que non existen colectores na vía pública.

O vehículo consta dunha plataforma móbil que se abre en dúas metades deixando un corredor central desde o que se accede aos colectores específicos para cada tipo de residuo. Nel hai un operario para axudar a que todos os residuos se depositen no colector que lles corresponde.

Os residuos que se poden depositar no punto limpo son aerosois, aceite doméstico, baterías e acumuladores, CD, DVD, disquetes e casetes, cristal, xoguetes, lámpadas e fluorescentes, pequenos electrodomésticos electrónicos (televisores, microondas, ordenadores, etc.), pilas, pinturas e vernices, radiografías, roupa e calzado e teléfonos móbiles.

Novas relacionadas:

AMSGO!: "O Punto Limpo recolleu en xaneiro case 900 unidades de pequenos aparatos eléctricos e electrónicos"