Do 3 ao 6 de abril, a localidade de Guadalajara acolleu a Karate Youth League, un evento que contou coa participación de máis de 3.000 karatekas de 80 nacionalidades diferentes. Os amesáns Xoán David Parga e Olivia Parga competiron nesta cita internacional que reuniu aos mellores deportistas do mundo nesta disciplina.

Por un lado, Xoán David Parga competiu na categoría junior <61kg, onde venceu no seu primeiro combate contra un karateka portugués por 4-1. Con todo, caeu na seguinte ronda contra un rival turco, que está entre os mellores do mundo. O amesán non puido optar a competir na repesca xa que o karateka de Turquía perdeu nas semifinais contra o número un do mundo.

Pola súa banda, Olivia Parga participou na categoría U14 <42kg, representando por primeira vez á Federación Española de Karate. Tras dous grandes combates onde venceu ás súas rivais de Portugal e Francia, a amesá caeu ante unha karateka de Malta nun axustado 3-3 no que a balanza se decantou a favor da maltesa ao contar coa vantaxe inicial. Finalmente, Olivia Parga tampouco conseguiu participar na repesca ao quedar eliminada a deportista de Malta na seguinte ronda.

Deste xeito, os dous deportistas de Ames realizaron unha gran participación nesta cita internacional, que lles serviu para seguir mellorando e avanzando a nivel profesional.

Novas relacionadas:

Diario de Santiago:  "Os deportistas amesáns Xoán David Parga e Olivia Parga participaron na Youth League de Karate"

AMSGO!: "Os irmáns Parga representan á Federación Española de Karate na Youth League de Guadalajara"