O xurado valorou os escaparates participantes pola súa capacidade de atracción e xeración do desexo de compra, en base aos criterios de composición e deseño, tendo en conta, ademais, a orixinalidade e a elaboración propia. Do mesmo xeito, valorouse a utilización de elementos propios do obxecto de venda da actividade e materiais de refugallo. Participaron 29 establecementos do Milladoiro e de Bertamiráns.

O xurado do XVI Concurso de Escaparates Concello de Ames Nadal 2021 estivo composto por Roberto Amarelle Garabán, en representación da Agrupación de Protección Civil de Ames; Martín Larre, en representación do voluntariado do Concello de Ames; e Félix Caramés Blanco, en representación da Unión de Consumidores de Galicia.

O xurado valorou de xeito individual cada escaparate e tomou nota da utilización de elementos propios da actividade comercial da empresa, así como da reciclaxe de materiais de refugallo. Cómpre destacar a gran igualdade entre os establecementos participantes, tal e como se demostra na mínima diferencia de puntos que existe entre os catro premiados.

Entre os establecementos gañadores repártese un total de 3.400 euros, o que supón un aumento de 900 euros con respecto á dotación da edición anterior. Nesta edición reduciuse o número de establecementos galardoados de cinco a catro. O primeiro premio é de 1.400 euros; o segundo, de 1.000 euros; o terceiro, de 600 euros, e o cuarto, de 400 euros. Ademais, os establecementos galardoados gozarán de espazos publicitarios gratuítos en Ames Radio durante un mes consecutivo, a determinar de acordo coas necesidades de programación da radio municipal.

Desta maneira, os establecementos gañadores foron:

• Primeiro premio: Peluquería Blanco y Negro (O Milladoiro) con 48 puntos.
• Segundo premio: Kiérete Peluquería (O Milladoiro) con 45 puntos.
• Terceiro premio: PC Bertamiráns Informática (Bertamiráns) con 44 puntos.
• Cuarto premio: Carnicería Sigüeiro (O Milladoiro) con 43 puntos.

A concelleira de Promoción Económica, Ana Belén Paz, “agradece o labor do xurado, que participaron desinteresadamente na elección dos mellores escaparates da décimo sexta edición deste concurso. A elección dos establecementos gañadores foi moi complicada debido ao alto nivel dos escaparates expostos, tal e como demostra a igualdade que hai nas puntuacións dos establecementos. Tamén teño que agradecerlle aos establecementos a súa implicación xa que ano tras ano se presentan o concurso de escaparates”.

Novas relacionadas

El Correo Gallego: "Gaña o certame de escaparates de Nadal a Peluquería Blanco y Negro"

AMSGO!: "O salón de peiteado Blanco y Negro gaña o concurso de escaparates de Nadal"