Unha coordinadora, designada pola Xunta de Galicia visitou os 14 locais electorais de Ames e deseñou, en colaboración co persoal municipal, a nova colocación das mesas de votación, da zona de papeletas e das cabinas. Esta visita é froito das medidas preventivas en materia de saúde pública fronte o Covid 19 para o desenvolvemento da Xornada electoral do 12 de xullo, que a Xunta recolle no Protocolo aprobado o 29 de maio mediante acordo do Consello da Xunta e publicado o 30 de maio no Diario Oficial de Galicia. O principal obxectivo deste Protocolo é garantir o normal desenvolvemento da xornada electoral, compatibilizándoo co mantemento da saúde pública.

O Protocolo foi aprobado polo Consello da Xunta, previo informe favorable do Comité clínico de expertos sanitarios de Galicia, e articula un completo sistema de medidas preventivas para garantir a saúde de todos os suxeitos que participan no dispositivo electoral e dos electores que exercen o seu dereito fundamental ao voto.

Así, os coordinadores asignados a cada concello ademais de colaborar na organización da adopción das medidas preventivas establecidas no protocolo dos locais electorais, farán roldas durante a xornada electoral para colaboraren na adecuación en auxilio dos/as presidentes/as nos momentos en que estes o soliciten ou autoricen.

Uso obrigatorio de máscaras para acceder aos colexios
As principais variacións con respecto a outras convocatorias electorais céntranse na recomendación de votar por correo, sempre que sexa posible. Ademais establécense medidas de protección para os membros de mesa e para os votantes. No acceso ao local haberá xel desinfectante, guantes para os alérxicos e máscaras que se deberán utilizar obrigatoriamente, agás que a persoa votante xa acuda ao local electoral provista dunha máscara propiaou acrediten contradición médica para o seu uso. Aos membros de mesa proporcionaráselles máscaras e pantallas.

Protocolos de limpeza e desinfección
Faranse as tarefas de limpeza e desinfección dos colexios electorais fixadas no Protocolo, de xeito que se limparán os locais antes do inicio da xornada, varias veces mentres transcorre e unha vez máis ao remate da mesma.

No interior dos locais electorais estableceranse circuítos que impidan que a xente se cruce. Tamén se poñerán en marcha controis de acceso na entrada para evitar que entre máis dun elector á vez por cada mesa. Por iso é moi importante que os electores leven o voto preparado da casa (se isto fose posible), que leven a tarxeta censal para ir directamente á mesa que lles corresponde e que non comparezan nas horas de maior afluencia a fin de evitar colas.

Os maiores de 65 anos, persoas con discapacidade e as persoas que estas precisen para o seu auxilio terán prioridade para a entrada nos locais electorais.

Os locais de Ames seguen sendo os mesmos, a excepción de Ventín, que aínda estando ubicado no mesmo CEIP, nesta ocasión utilizarase un pavillón anexo que resulta mais amplo que o utilizado ata agora.

Un Bando emitido pola alcaldía lembra todas estas normas e recomendacións, facendo especial fincapé nas recomendacións de votar por correo, levar o voto e a tarxeta censal preparados da casa e o uso obrigatorio de máscaras nos colexios electorais.

Transporte Adaptado
O Concello de Ames mantén o seu servizo de Transporte Adaptado para facilitar o dereito ao voto a aquelas persoas con problema de mobilidade que lles impide desprazarse en vehículo propio ou transporte público non adaptado.