Solapas principales

A proxección “Prefiro condenarme” inaugura unha nova edición do ciclo Abril de Cine

Martes, 25 de marzo de 2025

A vindeira semana comezará unha nova edición do ciclo Abril de Cine, unha iniciativa enmarcada dentro da programación deseñada polo departamento de Cultura do Concello de Ames e que nace co obxectivo de achegar o cinema galego actual á veciñanza amesá. Desta volta haberá tres sesións de cine, a primeira delas terá lugar o xoves 3 de abril, coa proxección do filme “Prefiro condenarme”, dirixida por Margarita Ledo. A segunda das proxeccións realizarase o xoves 10 de abril, con “Filmei paxaros voando”, dirixida por Zeltia Outeiriño. Por último, o martes 22 terá lugar unha noite de curtas, onde a veciñanza poderá gozar de catro curtametraxes diferentes. Todas as sesións do ciclo de cine se realizarán no auditorio do Milladoiro ás 20.00 horas e haberá unha presentación previa e un coloquio tras as proxeccións coas directoras e directores dos filmes. As entradas xa se poden adquirir a través da Billeteira electrónica do Concello de Ames.

O Concello de Ames, a través da Concellaría de Cultura, desenvolve, un ano máis, o programa cultural Abril de Cine no que a veciñanza poderá gozar ao longo de todo o mes de diferentes propostas de cinema galego. Desta volta, todos os filmes teñen un mesmo nexo en común: o desarraigamento.

Esta edición estará composta por tres sesións; nas dúas primeiras proxectaranse longametraxes en formato documental e na última das citas, exhibiranse catro curtametraxes de temáticas e formatos moi amplos, como a comedia filosófica ou, de novo, o formato documental. As entradas xa están dispoñibles na Billeteira electrónica.

O alcalde e concelleiro de Cultura, Blas García, destaca “en Ames apostamos por traer todo tipo de cultura, queremos ofrecer unha programación variada para satisfacer a todos os públicos”.

Dúas sesións de longametraxes
Todas as proxeccións son en galego e nesta edición estarán presentes as directoras e directores de cada un dos proxectos. Cada un deles participará nun pequeno coloquio ao finalizar cada filme para afondar nos aspectos máis rechamantes da obra audiovisual. Así mesmo, ao inicio haberá unha pequena presentación para orientar ao público cun par de claves sobre o filme antes da proxección.

A primeira das sesións terá lugar o vindeiro xoves 3 de abril coa película “Prefiro condenarme”, dirixida por Margarita Ledo, recoñecida xornalista, cineasta e escritora galega e que, entre outros logros, se converteu na primeira muller en conseguir o Premio Otero Pedrayo no 2017. Estreada o pasado 2024 e galardoada no Festival de Sevilla e no Locarmo Pro, esta película narra a historia de Sagrario, unha mariscadora da ría de Ferrol que afronta unha complicada situación familiar e, ademais, un xuízo por adulterio aos 33 anos debido á filla que ten co seu amante, un carpinteiro “digno de querer”.

Por outra banda, a segunda das xornadas de cinema desenvolverase o xoves 10 de abril, coa proxección “Filmei paxaros voando”, de Zeltia Outeiriño González, cineasta galega que comezou a desenvolver a súa carreira no mundo audiovisual en Cataluña e que, a día de hoxe, realizou varios documentais recoñecidos en diversos festivais. Nesta ocasión, o documental presenta unha parte autobiográfica, na que a propia Zeltia volta a Galicia, tras dúas décadas traballando en Barcelona, para narrar a historia do seu tío Antonio, un artesán téxtil que viviu intensamente nos anos 80. Neste retorno, Zeltia reencóntrase con súa nai, coa cal acaba compartindo momentos de complicidade e amor a pesar de non partir dunha boa relación.

Noite de curtas
Nesta edición de Abril de Cine, a última das sesións, que se realizará o martes día 22, as protagonistas serán as curtametraxes. Proxectaranse un total de catro curtas moi diferentes. Por un lado, “Platónico, platónica”, de Xacío Baño, na que se fai unha reflexión e conexión profunda entre o amor e a intelixencia artificial.

Outra das curtas que se proxectará nesta sesión será “Noites de prata” de Soraya Antelo, un proxecto, finalista nos Premios Mestre Mateo deste pasado 2024, que narra a historia de como Lola, unha cantante de boleros, abandonou Galicia polas terras do Río da Prata. A terceira das curtas será “Carracedo” de Manu Lucas Mariño, un documental que amosa a vida agochada tras o lutier contemporáneo membro do grupo galego De Ninghures.

A última das curtas que se proxectará nesta sesión será “Pechar caixas, abrir caixas” de Hugo Amoedo, un filme na que se narra a historia da volta a Galicia do escritor Xavier Queipo despois de máis de 30 anos en Bruxelas.

Novas relacionadas:

El Correo Gallego: "Desde 'Prefiro condenarme' a 'Noites de prata': el cine gallego actual llega este mes de abril a O Milladoiro"

AMSGO!: "“Prefiro condenarme” inaugura unha nova edición do ciclo Abril de Cine"

A proxección “Prefiro condenarme” inaugura unha nova edición do ciclo Abril de Cine