O acto comezou cunha breve intervención do alcalde, Blas García, á que posteriormente seguiu a imposición das medallas, comezando pola concelleira non adscrita e continuando polos concelleiros/as dos grupos (de menor a maior representatividade) e rematando polo alcalde. As medallas foron impostas polo alcalde, e a do alcalde foi imposta polo primeiro tenente de alcalde. Unha vez impostas as medallas interviron a concelleira non adscrita e os voceiros/as dos grupos políticos con representación na Corporación, de menor a maior representatividade.

A concelleira non adscrita, Luisa Feijoo, dixo que “esta medalla é unha bonita lembranza do paso pola Corporación como concelleiros e concelleiras, aínda que o máis importante e o que debe perdurar é o feito durante estes últimos anos”. José Ramón Oulego, de Ciudadanos, explicou que “recibir esta medalla simboliza a pertenza a este concello no que xa levo 10 anos vivindo. Tamén simboliza que existe outra forma de facer política. Aquí en Ames fomos capaces de traballar e facer política en prol da veciñanza entre seis grupos políticos diferentes”.

De seguido Quique Costas, de Ames Novo, dixo que “as medallas non deixan de ser un símbolo. O importante é o que fixemos e vivimos neste salón de plenos. Eu levo sete anos pertencendo a esta Corporación. É un período da miña vida que remata ao final do actual mandato. Voume moi agradecido dos vínculos establecidos durante todos estes anos. Esta medalla recordarame todo o vivido aquí”.

David Santomil, voceiro do BNG de Ames, dixo “quero compartir esta medalla cos meus compañeiros e compañeiros do Bloque Nacionalista Galego e en participar lembrarme de Xosé Manuel Fernández e do resto de compañeiros/as que formaron parte do BNG no mandato de 2007 a 2011 que foi a miña primeira etapa como membro desta Corporación. Despois dun parón por motivos persoas volvín á política en 2015 e desta volta coa responsabilidade de formar parte do Goberno local”.

A voceira do grupo municipal popular, Oliva Agra destacou que “nos tempos que corren e, tal e como está o mundo da política, recoñecer con estas medallas o honroso traballo que desempeñamos de xeito desinteresado pola nosa xente é positivo. Para min persoalmente e creo que para todos os compañeiros que estamos hoxe aquí é un orgullo recibila”. Tamén destacou que “en Ames nunca se perde o respecto. Ames respectase a si mesmo, e por iso respecta a todos. Fronte á división, en Ames hai unidade. Fronte a crispación, en Ames hai dialogo”.

Victor Fernández, voceiro do grupo municipal socialista dixo que “é un orgullo recibir esta medalla polo que simboliza e tamén polo aprendido durante os últimos catro anos. Somos unha Corporación que ante todo temos un compromiso de militancia común a favor do noso concello. A entrega destas medallas facíase a comezos de mandato, pero creo que ten máis sentido facelo agora ao finalizar o mandato da Corporación. Compromiso, ilusión, traballo, esforzo, dar o mellor de nós... serían palabras que diriamos o primeiro día pero que se materializaron ao longo deste catro anos. Houbo colaboración e sacáronse moitos proxectos comúns adiante. O dialogo foi o que guiou a relación política deste goberno e da corporación”.

Pechou o acto o alcalde de Ames, Blas García, que cualificou o mandato 2019-2023 como “o mandato do orgullo polo traballo feito. Durante os últimos catro anos vivimos momentos complicados debido á pandemia da Covid. Ademais, houbo dous compañeiros que deixaron a Corporación por diversos motivos como foi Jose Miñones e Ramón García Argibay e aos que tamén lle entregamos esta medalla que hoxe estamos recibindo nós. Uns deixaremos esta Corporación antes e outros despois, pero creo que debemos marchar coa cabeza alta polo traballo feito, a dignidade amosada e maila honradez demostrada no traballo feito. Tamén é un motivo de orgullo que esta Corporación é un referente para moitas outras, porque demostrou que traballa de xeito conxunto e dándolle prioridade ao dialogo para acadar o consenso”.